Ailə mübahisəsi qanla bitdi: Ata səhvən qızını vurdu, sonra intihar etdi

Türkiyənin Kocaeli vilayətinin Çayırova rayonunda ailə mübahisəsi faciə ilə nəticələnib.

Sonxeber.az türk mediasına istinadən xəbər verir ki, 60 yaşlı Muzaffer Yıldız evdə ailəsi ilə mübahisə etdiyi zaman təsadüfən qızını vurub, daha sonra isə eyni silahla özünə atəş açaraq həyatına son qoyub.

Hadisə gecə saat 22:00 radələrində Atatürk məhəlləsində yerləşən iki mərtəbəli evdə baş verib. İlkin məlumatlara görə, ailə daxilində başlayan mübahisə zamanı Muzaffer Yıldız əsəblərinə hakim ola bilməyib və tapançasını çıxarıb. Bu zaman silahdan açılan güllə təsadüfən qızı — Meltem Yıldıza dəyib. Güllə gənc qadının qarnına isabət edib.

Qanlar içində yerə yıxılan qızını görən ata, silahı başına dayayaraq atəş açıb. Evdən gələn silah səslərini eşidən qonşular dərhal hadisə barədə "112" Təcili Yardım Mərkəzinə məlumat veriblər.

Hadisə yerinə gələn polis və təcili tibbi yardım əməkdaşları yaralıları xəstəxanaya çatdırıblar. Muzaffer Yıldız ağır vəziyyətdə aparıldığı özəl xəstəxanada bütün tibbi müdaxilələrə baxmayaraq həyatını itirib. Qızı Meltem Yıldız isə ağır yaralı vəziyyətdə əməliyyata alınıb.

Polis hadisə ilə bağlı araşdırmaya başlayıb.

Telegramda izləyin