Qorxu evi əməkdaşı gənc qadına kabus yaşatdı: Yerdə sürüyüb elektroşok tətbiq etdi - VİDEO

İstanbulun Beyoğlu rayonuna bağlı Katib Mustafa Çələbi məhəlləsində yerləşən bir qorxu evində dəhşətli bir hadisə baş verib. Əldə edilən məlumatlara görə, Melikə Q. (24) altı dostu ilə birlikdə əylənmək məqsədilə Taksimdəki qorxu evinə gedib.

Sonxeber.az türk mediasına istinadən xəbər verir ki, burada Melikə Q. və dostlar qorxu evinin əməkdaşlarından qorxu otaqlarında onlara toxunulmamasını xahiş edib. İddialara görə, işçilər də qonaqlara onlara toxunulmayacağını bildiriblər. Bunun ardınca 7 nəfərlik qrupdan 6-sı qorxu otaqlarına girərək əylənməyə başlayıb.

Lakin Melikə Q.-nın olduğu otağa daxil olan qorxu evi əməkdaşlarından biri, gənc qadını saçından və boynundan tutaraq yerə yıxıb. Daha sonra onun çənəsini, boynunu sıxıb və iddiaya görə əlindəki cihazla ona elektroşok tətbiq edib. Seansdan sonra müəssisədən çıxan Melikə Q. xəstəxanaya gedərək döyülmə diaqnozu ilə tibbi arayış alıb.

O, istəmədiyi halda ona toxunulduğunu, zorakılığa məruz qaldığını və elektroşok tətbiq edildiyini bildirərək Taksim Şəhid Haşim Usta Polis Bölməsinə müraciət edib və həm müəssisədən, həm də əməkdaşdan şikayətçi olub.

Melikə Q.-nın ifadəsi və təhlükəsizlik kamerası görüntüləri əsasında hərəkətə keçən Güvən Timləri Şöbə Müdirliyinin B Regionu əməkdaşları qorxu evində çalışan Baran T.-ni (18) saxlayıblar.

Baran T. polisə verdiyi ifadəsində, müştərilərə otağa girməzdən əvvəl toxunma ola biləcəyi barədə məlumat verildiyini deyib. Onun barəsində "qəsdən xəsarət yetirmə" maddəsi ilə hüquqi prosedur başlanıb.

Əməliyyatları tamamlanan Baran T. prokurorluğun qərarı ilə sərbəst buraxılıb. Digər tərəfdən, Beyoğlu Asayiş Büro Müdirliyi və Beyoğlu Bələdiyyəsinin Zəbtə Müdirliyi əməkdaşları hadisənin baş verdiyi qorxu evini möhürləyiblər.

Telegramda izləyin