15 yaşlı gənc üzərinə benzin tökülərək yandırıldı - FOTO

Antalya şəhərində 15 yaşlı E.A., motosiklet servisində çalışan dostu 16 yaşlı A.K.K. tərəfindən üzərinə benzin tökülərək yandırılıb.

Sonxeber.az türk mediasına istinadən xəbər verir ki, ağır xəsarət alan gənc aylarla davam edən müalicədən sonra xəstəxanadan buraxılıb, ailəsi isə həm hadisəni törədən, həm də işəgötürən barəsində məhkəmə iddiası qaldırıb.

İddialara görə, E.A. üzərinə benzin tökülərək A.K.K. tərəfindən yandırılıb. Servisdəki digər əməkdaşlar yanğın söndürmə cihazları ilə hadisəyə müdaxilə edib. Bədənin yarısından çoxu yanan E.A., helikopterlə Ankara Bilkent Şəhər Xəstəxanasına çatdırılaraq müalicə altına alınıb. Təxminən 6,5 ay davam edən müalicə zamanı E.A.-ya bədənin 50%-i üçün dəri köçürülməsi edilib və ona 49% əlillik rəyi verilib.

Hadisə anı təhlükəsizlik kameralarına da düşüb. Görüntülərdə A.K.K.-nin yağ təmizləmə otağına girdiyi və qısa müddət sonra ani alov partlamasının baş verdiyi görünür. A.K.K., ayağına sıçrayan alovdan qaçmağa çalışarkən, E.A. bədənini örtən alovları söndürmək üçün yerə düşərək çırpınıb.

E.A.-nın vəkili Barkın Öztürk bildirib ki, hadisə "zarafat" kimi qiymətləndirilə bilməz və cinayətkar "qəsdən adam öldürməyə cəhd" ittihamı ilə mühakimə olunmalıdır. Öztürk əlavə edib ki, işəgötürən də lazımi təhlükəsizlik tədbirlərini görmədiyi üçün məsuliyyət daşıyır.

Hadisə ilə bağlı həm cinayət işi, həm də iş təhlükəsizliyi üzrə təzminat iddiası davam edir.

Telegramda izləyin