Almaniyada mobil bunkerlər satılacaq

Almaniyada ənənəvi tikinti materialları mağazalarında satışa çıxarılacaq ilk mobil bunker təqdim edilib.

Oxu.Az xəbər verir ki, bu barədə "Bild" nəşri məlumat yayıb.

Məlumata görə, son aylarda Almaniyada özəl bomba sığınacaqlarına tələbat artıb və bu, pərakəndə satış sektorunda reaksiyaya səbəb olub.

Bunker prototipi "BSSD Defence" və "Veloform" şirkətləri tərəfindən hazırlanıb.

Bunker sahəsi 16 kvadratmetr olan modul qaraja bənzər bir qurğudur. Onun hündürlüyü 2.8 metr, divarların eni isə 20 sm-dir. Bunkerdə insanların ehtiyacı ola biləcək hər şey var: tualet, duş, kiçik mətbəx, dörd ədəd qatlanan çarpayı və pəncərələrə bənzəyən mənzərəli böyük ekran.

Bunker, təxminən bir həftə ərzində çölə çıxmadan istifadə edilə bilər. O, dron zərbələrinə və hətta 107 mm-lik raketlərə belə tab gətirə bilər.

Tam təchiz olunmuş modulun qiyməti təxminən 150 000 avro olacaq.

Telegramda izləyin