Viktoriya Bekhem məktəbdə təqiblərə məruz qaldığından gileylənib

Müğənni və dizayner Viktoriya Bekhem gileylənib ki, vaxtilə bir mental xüsusiyyətinə görə məktəbdə sinif yoldaşları tərəfindən təqiblərə məruz qalıb.

Oxu.Az xəbər verir ki, o bu barədə "Call Her Daddy" podkastında danışıb.

51 yaşlı britaniyalı ulduzun sözlərinə görə, uşaqlıqda utancaq və çəlimsiz qız olub, özü-özünə disleksiya və diskalkuliya diaqnozu qoyub. Yazı yazanda, riyaziyyatı öyrənməkdə çətinlik çəkib. Buna görə də sinif yoldaşları tərəfindən daima masqaraya qoyulub.

"Amma bütün bunlar məni güclü etdi, çünki kollecdə də məni təqib etməyə başladılar. Yetərincə yaxşı olmadığımı, düzgün görünmədiyimi söyləyirdilər. Deyirdilər ki, səhnədə çıxış etmək üçün çox kütəm. Bütün bunlar məndə güclü olmaq əzmi yaradırdı", - deyə o xatırlayıb.

Bekhemin sözlərinə görə, heç vaxt həmyaşıdları ilə qaynayıb-qarışa bilməyib, çünki onlar məktəbdən sonra siqaret çəkib, əylənəndə, o, rəqslə və ya dram sənəti ilə məşğul olub.

"Dərim çox pis idi, qorxunc sızanaqlara bürünmüşdü, saçlarım isə solğun idi. Yadımdadır ki, uşaq meydançasında həmişə tək dayanırdım. Uşaqlar gölməçənin içindən tənəkə qutularını götürüb mənim üstümə tolazlayırdılar. Məktəbdə mənə həm fiziki, həm də mənəvi əziyyətlər verirdilər", - deyə ulduz əlavə edib.

Telegramda izləyin