"Azərbaycan-Belarus arasındakı münasibətlər strateji müttəfiqlik istiqamətində yüksələn xətlə inkişaf edir" - DEPUTAT

"Bu gün Azərbaycan-Belarus arasındakı münasibətlər yüksək dinamika ilə inkişaf edir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Azərbaycan-Belarus dövlətləri arasındaki münasibətlər hər zaman səmimi dostluq və əməkdaşlıq prinsiplərinə söykənib:

"Müstəqillik əldə etdikdən sonra Belarus və Azərbaycan arasında diplomatik əlaqələr 1993-cü ildə qurulub. Amma Prezident İlham Əliyevin hakimiyyəti dönəmində bu əlaqələr yeni inkişaf mərhələsinə qədəm qoyub. İki ölkə arasında strateji tərəfdaşlıq dövlət başçıları – Prezident İlham Əliyev və Prezident Aleksandr Lukaşenko arasında formalaşmış qarşılıqlı etimad, səmimi siyasi dialoq və dostluq münasibətləri əsasında inkişaf edir. İki ölkə arasında münasibətlərini ikişafı müxtəlif sahələr üzrə qarşılıqlı faydalı iqtisadi əməkdaşlığın genişlənməsində və yeni birgə layihələrin gerçəkləşdirilməsində özünü göstərir".

Deputat vurğulayıb ki, Belarus-Azərbaycan münasibətləri yüksək səviyyəli rəsmi səfərlər və səmərəli müzakirələr, imzalanan yeni sənədlər sayəsində daha dinamik və işgüzar xarakter alıb:

"Aqrar istehsal və hərbi-sənaye kompleksinə, tranzit əhəmiyyətinə görə postsovet məkanında seçilən ölkələrdən olan Belarusla çoxşaxəli əməkdaşlığın yeni dövrün tələblərinə uyğun davam etdirilməsi ölkəmiz üçün mühüm əhəmiyyət daşıyır. İqtisadi inkişaf tempinə görə Belarus və Azərbaycanın postsovet məkanında öncüllər sırasında olmaları da ikitərəfli əməkdaşlığa olan marağı gücləndirir.Dövlət başçılarının qarşılıqlı səfərləri də münasibətlərin dinamik inkişafına xüsusi təkan verir. Azərbaycan Prezidenti İlham Əliyevin Belarusa 2006-cı ilin oktyabr ayında reallaşan ilk rəsmi səfəri ikitərəfli əlaqələrin bütün sahələrdə inkişaf etdirilməsi niyyətinin bariz təzahürü olub. Səfər zamanı imzalanmış "Belarus Respublikası ilə Azərbaycan Respublikası arasında 2015-ci ilədək sosial-iqtisadi əməkdaşlıq haqqında" müqavilə ticatər dövriyyəsinin artımında mühüm rol oynayıb.

İki ölkənin əməkdaşlığında müdafiə və hərbi sənaye sahələri mühüm yer tutur. Azərbaycan və Belarus müdafiə nazirlikləri arasında ikitərəfli əməkdaşlıq planları hərbi-texniki və hərbi təhsil sahələrində əlaqələrin genişləndirilməsinə geniş imkanlar açıb. Bu planlar ekspert qruplarının qarşılıqlı səfərlərinin təşkilini, silah sistemlərinin və hərbi texnikaların birgə modernləşdirilməsi üzrə tədbirlərin keçirilməsini, sülhü dəstəkləmə, humanitar yardım və xilasetmə əməliyyatlarının keçirilməsi barədə məsələhətləşmələri nəzərdə tutur. Onu da bildirək ki, Belarusun "Tetraedr" şirkəti 2011-ci ildən "Azairtechservice" şirkəti ilə birgə Azərbaycan Ordusunun Hərbi Hava Qüvvələrinin arsenalında yer alan zenit-raket komplekslərinin və radiolokasiya stansiyalarının müasirləşdirilməsi prosesində iştirak edir. Bir sözlə Belarus Azərbaycanın MDB məkanında ən yaxın tərəfdaşıdır və ikitərəfli münasibətlər strateji müttəfiqlik istiqamətində yüksələn xətlə inkişaf edir".

Telegramda izləyin