Sərxoş şəxs yoldan keçənlərə hücum etdi, 1 nəfər ağır yaralandı

Antalyanın Kepez rayonunda baş verən hadisə böyük panikaya səbəb olub.

Sonxeber.az türk mediasına istinadən xəbər verir ki, Ulus məhəlləsində yerləşən Fatih Sultan Mehmet Parkında içki qəbul edən bir şəxs, yoldan keçənlərə əvvəl sözlü, daha sonra isə fiziki hücum etməyə başlayıb.

Hadisə zamanı şübhəli üzərindəki bıçağı çıxararaq səki ilə hərəkət edən və skuter sürən 58 yaşlı Ali Haydar Ö.-yə hücum edib. Qısa müddətlik əlbəyaxa zamanı Ali Haydar Ö. sinəsindən aldığı bıçaq zərbəsi ilə yıxılıb. Ətrafdakı vətəndaşlar yaralıya yardım göstərməyə çalışıb və dərhal 112-yə məlumat verilib.

Hadisəni törədən şəxs bıçağı parkın otlarının üzərində təmizləyib və ərazidən uzaqlaşıb. Yaralı ilkin tibbi yardım göstərildikdən sonra təcili yardım maşını ilə xəstəxanaya çatdırılıb. Onun vəziyyətinin ağır olduğu bildirilir.

Polis hadisədən sonra ərazidəki təhlükəsizlik kameralarını araşdıraraq şübhəlinin kimliyini müəyyən edib. Suç Araşdırma və Qarşısının Alınması Bürosu əməkdaşları, Sedat D. adlı şəxsin qaçış marşrutunu kamera görüntüləri vasitəsilə addım-addım izləyərək onu qısa zamanda saxlayıb.

Şübhəli ifadəsinin alınmasından sonra məhkəməyə çıxarılaraq həbs edilib və cəzaçəkmə müəssisəsinə göndərilib.

Hadisə anına çəkilən görüntülərdə Sedat D.-nin əlində bıçaqla küçədə sakit şəkildə hərəkət etdiyi açıq şəkildə görünür. Polis, hücum zamanı 4 nəfərin təhdid edildiyini, 1 nəfərin isə ağır yaralandığını təsdiqləyib.

Telegramda izləyin