30 illik təcrübəli dəniz bioloqu akula hücumundan sağ çıxdı: "O mənim həyatımı bağışladı"

Təxminən 30 ildən çoxdur akulaları təbii mühitlərində araşdıran məşhur dəniz bioloqu Maurisio Hoyos sentyabr ayında Kosta Rikada elmi ekspedisiya zamanı həyatının ən qorxulu anlarından birini yaşayıb.

Sonxeber.az türk mediasına istinadən xəbər verir ki, 3–3,5 metr uzunluğunda olan dişi Qalapaqos akulası ona qəfil hücum edib. Hoyos başını aşağı salaraq şah damarını qorumağa çalışıb.

Akulanın çənəsi onun yanağına və başına toxunub, lakin heyvan bir neçə saniyə sonra onu buraxıb. Buna baxmayaraq, mişara bənzəyən 29 iti diş Hoyosun üzündə və başında dərin yaralar açıb, eləcə də dalğıc balonunun oksigen bağlantısını qoparıb.

Təcrübəli bioloq panikaya düşmədən ehtiyat oksigen xortumunu işə salıb, tənzimləyicinin təzyiqini dodaqları ilə idarə edərək koordinasiyalı şəkildə suyun üzünə çıxıb. Sahilə çatdırıldıqda tibbi heyət onu gözləyirdi. Yaraların böyük qismi infeksiya olmadan qısa müddətdə sağalıb.

Hoyos hadisədən sonra akulalara hörmətinin daha da artdığını, onların okean ekosistemində oynadıqları həyati rolu daha yaxşı anladığını deyir. Hadisə onun araşdırma eşqini də azaltmayıb — yanvar ayında yenidən Kosta Rikanın Kokos adasında dalış etməyi planlaşdırır və həmin gün qarşılaşdığı akula ilə bir daha üz-üzə gələcəyinə ümid edir.

Hücum edən akulanın onu dərhal buraxmasını "bir növ həyatımı bağışlaması" kimi dəyərləndirən bioloq belə deyib:
"Üzümdəki bu iz, həyatımı bağışlayan dişi akulanın canlı sübutudur. Onun sayəsində akulaların əhəmiyyətini müdafiə etməyə və okeanları qorumağa davam edəcəyəm"

Hoyosun yanağında qalmış yara izi həm onun möcüzəvi şəkildə həyatda qalmasının, həm də akulaların mühafizəsinə olan bağlılığının simvolu kimi qalır.

Telegramda izləyin