140 ölkəni gəzmiş turist - Hər il ora qayıdır

Dünyanın 140-dan çox ölkəsini ziyarət edən amerikalı səyahətçi Kris D. Braun etiraf edir ki, hər il qayıtmaq istədiyi yalnız bir ölkə var, o da İspaniyadır.

Lent.az xəbər verir ki, Braun artıq 15 ildir ki, bu ölkəni yenidən ziyarət edir və bunun səbəblərini yazdığı məqalədə açıqlayıb.

Onu ən çox təsirləndirən şəhər - Sevilya

Braun deyir ki, Sevilya elə şəhərdir ki, insanlar, küçə sənəti və tarixi memarlığın vəhdəti insanda dərhal heyranlıq yaradır. Şəhər hazırda İspaniyanın yaşayış üçün ən yaxşı məkanlarından biri hesab olunur və səyahətçinin ürəyində xüsusi yer tutur.

İspaniyaya aparan dadlar

Səyahətçi hər il buraya qayıtmasının əsas səbəblərindən birinin ispan mətbəxi olduğunu bildirir. O, xüsusilə Bask ölkəsinin məşhur pinchos qəlyanaltılarından "xilda"nı zeytun, ançous və bibərlərdən ibarət kiçik şişləri tövsiyə edir. Braun ayrıca Padrón bibəri və Alhambra 1925 pivəsini də dadmağı məsləhət görür.

Kultur və incəsənət hər yerdə hiss olunur

Braunun sözlərinə görə, İspaniya mədəniyyəti elə bir atmosfer yaradır ki, onu başqa ölkələrdə tapmaq çətindir. Onu ən çox heyran edən məkanlardan biri Qranadadakı Alhambra sarayı və məşhur Şirlər həyətidir.

Səyahətçi bildirir ki, ölkənin digər mədəni paytaxtları da az təsirli deyil:

Barselona - Sagrada Familia, Park Güell, Pikasso muzeyi

Madrid - Prado muzeyi, Kral sarayı və onlarla digər qalereya

İspaniyanın festival ruhu

Braunun ən sevdiyi tədbirlərdən biri Xeres-de-la-Fronteradakı At yarmarkasıdır. Burada ənənəvi rəqslər, at şouları və yerli mətbəxin təqdimatı xüsusi atmosfer yaradır. O, həmçinin Valensiyadakı Las Fallas festivalının yüzlərlə taxta və kağız fiqurun yandırıldığı möhtəşəm gecənin təsirindən danışır.

Rahat nəqliyyat sistemi

Səyahətçi vurğulayır ki, İspaniyada səyahət etmək çox rahatdır. Madrid, Barselona, Valensiya və Sevilya yaxşı inkişaf etmiş metro, avtobus və dəmiryolu xəttinə malikdir və şəhərlərarası səfərlər maksimum komfortlu şəkildə təşkil olunur.

Hər səfərdə yeni kəşflər

Braun deyir ki, İspaniyanı neçə dəfə gəzir-gəzsin, hər dəfə yeniliklərlə qarşılaşır və artıq növbəti səfərini səbirsizliklə gözləyir. Xüsusilə də 140 ildən sonra gələn il tamamlanması gözlənilən Sagrada Familianın tikintisinin bitməsini həyəcanla izləyir.

Telegramda izləyin