Eyni məhsul müxtəlif marketlərdə fərqli qiymətə: Qanun nə deyir? - AÇIQLAMA

Son dövrlər eyni markaya və eyni xüsusiyyətlərə malik məhsulların müxtəlif market şəbəkələrində ciddi qiymət fərqləri ilə satılması istehlakçılar arasında narazılıq və suallar yaradıb. Bəzən bir məhsulun qiyməti bir marketdə daha münasib olduğu halda, başqa satış nöqtəsində xeyli baha təklif olunur. Bu vəziyyət bazarda rəqabət mühitinin, qiymət formalaşması mexanizmlərinin və nəzarət mexanizmlərinin effektivliyi ilə bağlı müzakirələri gündəmə gətirir.
Bəs, eyni məhsulun müxtəlif marketlərdə fərqli qiymətlərlə satılmasının əsas səbəbləri nələrdir və bu vəziyyət bazar iqtisadiyyatı çərçivəsində normal hesab edilirmi, yoxsa burada süni qiymət artımı və ya rəqabət pozuntusu riski mövcuddur?

Mövzu ilə bağlı Sonxeber.az-a iqtisadçı ekspert Natiq Cəfərli danışıb.

O, açıqlamasında qeyd edib ki, pərakəndə satışda dövlət tərəfindən tənzimlənən qiymətlər mövcud deyil:

"Yəni, eyni məhsul bir marketdə baha, digərində ucuzdursa, bu, tamamilə normal haldır: insanlar ucuz satandan alacaq, daha baha satan isə ziyan edəcək. Qanunvericilik baxımından bu, heç bir problem yaratmır. Pərakəndə satışda müxtəlif qiymətlərin tətbiqi tamamilə mümkündür. Satıcıların əsas öhdəliyi isə qazancından vaxtında vergi ödəməkdir. Ərzaq məhsulları sahəsində isə vəziyyət fərqlidir: insan sağlamlığı ilə bağlı hər hansı problem yarandıqda satıcılar ciddi məsuliyyət daşıyırlar. Qiymətlə bağlı isə hər hansı məhdudiyyət yoxdur. Əksinə, daha rəqabətli mühit formalaşmalıdır. Qiymət fərqləri açıq olduqda vətəndaş ucuz və keyfiyyətli məhsul seçmək imkanına malik olur, bu isə digər satıcıları daha sərfəli qiymət təklif etməyə təşviq edir və bazarda sağlam rəqabət yaradır".

Vüsalə İbrahimli

Telegramda izləyin