Yaşlı kişinin 25 il ərzində evində topladığı zibili 20-yə yaxın yük maşını iki günə təmizlədi - VİDEO

Türkiyənin Sakarya vilayətinin Akyazı rayonunda 76 yaşlı kişinin 25 il ərzində evində topladığı zibillər aidiyyəti qurumları hərəkətə gətirib. İki gün davam edən təmizləmə işləri nəticəsində evdən təxminən 20 yük maşını həcmində tullantı çıxarılıb.

Sonxeber.az türk mediasına istinadən xəbər verir ki, rayonun Yeni Mahalle məhəlləsində yerləşən və 76 yaşlı İ.T.-yə məxsus olduğu bildirilən evlə bağlı sakinlərin müraciətindən sonra araşdırmalara başlanılıb.

Hadisə yerinə baxış keçirən qurum əməkdaşları iki mərtəbəli evin birinci mərtəbəsinin tamamilə zibillə dolu olduğunu müəyyən ediblər. Bundan sonra bələdiyyə işçiləri xüsusi texnika və yük maşınlarının köməyi ilə ev və həyətdə yığılan tullantıların daşınmasına başlayıblar. Mənzildən və əlavə tikililərdən çıxarılan çoxsaylı tullantılar nəzarətli şəkildə maşınlara yüklənərək ərazidən uzaqlaşdırılıb.

İ.T.-nin 25 il ərzində topladığı zibillərin daşınması prosesi zamanı polis və bələdiyyə nəzarət xidmətinin əməkdaşları ərazidə təhlükəsizlik tədbirləri görüblər. Eyni zamanda, mümkün risklərə qarşı təcili tibbi yardım briqadası da hazır vəziyyətdə saxlanılıb.

Müdaxilə zamanı hər hansı xoşagəlməz hadisə qeydə alınmayıb. Təxminən iki gündür davam edən işlər çərçivəsində 20-yə yaxın yük maşını həcmində tullantı çıxarıldığı bildirilir. Təmizləmə işlərinin sabah da davam edəcəyi qeyd olunur.

Telegramda izləyin