Təzyiq ölçən cihazınız səhv göstərə bilər: Qol vəziyyəti göstəricilərə necə təsir edir

Yüksək qan təzyiqi infarkt və insultun əsas səbəblərindən biridir. Lakin mütəxəssislər bildirirlər ki, təzyiq ölçülərkən kiçik detallar belə nəticələrə ciddi təsir göstərə bilər.

Lent.az xarici mediaya istinadən xəbər verir ki, ölçmə zamanı qolun mövqeyi nəticələri dəyişə bilər. Əgər qol aşağı sallanırsa, təzyiq göstəriciləri təxminən 7 mm civə sütunu daha yüksək çıxa bilər. Bu fərq insanın təzyiqini normal və ya yüksəlmiş səviyyədən daha təhlükəli mərhələyə keçirə bilər. Araşdırmada 18-80 yaş arasında 133 könüllü iştirak edib. Onların təzyiqi üç fərqli vəziyyətdə ölçülüb:

qol masa üzərində olduqda

qol dizlərin üzərində olduqda

qol aşağı sallandıqda

Nəticələr göstərib ki, qol dizlərin üzərində olanda təzyiq orta hesabla təxminən 4 mm, qol sallananda isə 6 mm-dən çox yüksək ölçülür. Mütəxəssislər qeyd edir ki, bəzi hallarda tibbi müayinələr tələsik aparılır və xəstənin qolu düzgün mövqedə olmur. Bu isə yanlış nəticələrə və hətta səhv diaqnoza səbəb ola bilər.

Kardioloqların tövsiyəsinə görə, qan təzyiqini düzgün ölçmək üçün insan stulda arxası dayaqla oturmalı, ayaqları yerə düz qoyulmalı və qol ürək səviyyəsində masa üzərində saxlanmalıdır. Ev şəraitində təzyiq ölçərkən də bu qaydalara əməl etmək vacibdir. Məsələn, qolu dəstəkləmək üçün yastıqdan istifadə etmək və ya cihazı daha hündür səthə yerləşdirmək tövsiyə olunur.

Təzyiq ölçülməsi zamanı hətta kiçik səhvlər belə yanlış diaqnoz və ya lazımsız müalicəyə səbəb ola bilər. Buna görə də ölçmə zamanı düzgün mövqe çox vacibdir.a

Telegramda izləyin