"Dünyanın heç bir yerində mart ayında buraxılış imtahanı verilmir" - AÇIQLAMA

Martın 9-da 11-ci sinif şagirdləri üçün ölkə üzrə keçirilən buraxılış imtahanından sonra sosial şəbəkələrdə və təhsil ictimaiyyətində müzakirələr başlayıb.

Bəzi şagirdlər və təhsil mütəxəssisləri imtahana salınan sualların ayrılan vaxtla tam mütənasib olmadığını, ötən illərlə müqayisədə daha çətin olduğunu iddia ediblər.

Bəs görəsən doğurdanmı DİM sualları ədalətli tərtib etmir?

Təhsil eksperti Şəmsi Qoca bu barədə Sonxeber.az -a açıqlama verib:

"Mən də bu məsələ ilə bağlı çoxsaylı narazılıqlar eşitmişəm. Məsələn, Ağstafada dinləmə cihazı işləməyib və düzəlməsi vaxt aparıb, lakin sonra vaxtı uzatmayıblar. Eləcə də suallarla bağlı narazılıq çoxdur. Qanuna görə Azərbaycanda təhsil 11 illikdir. Mənsə deyirəm ki, bizdə təhsil 10 il yarımdır. Çünki dünyanın heç bir yerində mart ayında buraxılış imtahanı verilmir. Dünən imtahan verən abituryentin artıq bu gün məktəbə getməyinin nə mənası var? İmtahan verən uşağın məktəbdə heç bir asılılığı yoxdur artıq. Sualların ədaləti ilə bağlı hələlik nəsə deyə bilmərik. Bunu suallar açıqlandıqdan sonra biləcəyik. Adətən DİM suallarında problem çox az olur. Əgər səhv olsa, DİM o sualı abituryentin xeyrinə hesablayır. Sualların ədalətinə gəldikdə isə bilən uşağa heç bir çətinlik olmamalıdır, bilməyənə isə hər şey çətindir. Ona görə də bu məsələdə fikir bildirmək yaxşı deyil. Suallar açıqlandıqdan sonra bir fikir bildirmək olar: ədalətli idi yoxsa deyildi. Ola bilər ki, keçmədikləri mövzu sual olaraq düşsün. DİM-lə Təhsil Nazirliyinin proqramı üst-üstə düşmədiyi üçün ola bilər. Bu məlum olsa, o bal abituryentin xeyrinə hesablanacaq. Gəlin bu məsələdə tələsməyək."

Telegramda izləyin