Diqqət: İnstagramda qadınların adından saxta hesablar açılır!

Son günlər Instagram istifadəçiləri arasında yeni bir saxta hesab dalğası yayılmağa başlayıb. Sosial şəbəkədə xüsusilə qadınların adından açılan "fake" hesablar zəncirvari şəkildə artır və istifadəçilər üçün təhlükə yaradır.

Sonxeber.az məlumat verir ki, naməlum şəxslər əvvəlcə real qadın istifadəçilərin adından saxta profil yaradır və onların dost siyahısındakı insanlara izləmə sorğusu göndərirlər. İzləmə sorğusunu qəbul edən şəxslərin profilindəki şəkillər isə daha sonra oğurlanaraq yeni saxta hesabların yaradılmasında istifadə olunur.

Beləliklə, eyni üsulla hər dəfə yeni hesablar açılır və proses zəncirvari şəkildə davam edir. Nəticədə bir müddət sonra sosial şəbəkədə eyni şəxsin adı və şəkilləri ilə bir neçə saxta profil ortaya çıxır.

Mütəxəssislər bildirir ki, bu cür saxta hesablar bəzən insanları aldatmaq, şəxsi məlumat toplamaq və ya müxtəlif dələduzluq halları üçün istifadə oluna bilər. Buna görə istifadəçilərə tanımadıqları profillərdən gələn izləmə sorğularını qəbul etməmək, şəxsi şəkillərin görünürlük ayarlarını məhdudlaşdırmaq və şübhəli hesabları platformaya şikayət etmək tövsiyə olunur.

Telegramda izləyin