Buraxılış imtahanları niyə mart ayında keçirilir? - AÇIQLAMA

Son günlər sosial şəbəkələrdə bir sıra abituriyentlər buraxılış imtahanlarının mart ayında keçirilməsinə etiraz etdiklərini bildirirlər. Onların fikrincə, imtahanın bu qədər erkən tarixə salınması hazırlıq prosesinə mənfi təsir göstərir və şagirdlərə əlavə təzyiq yaradır.

Məsələ ilə bağlı müxtəlif fikirlər səsləndirilir: bəziləri imtahanların daha gec keçirilməsinin tərəfdarıdır, digərləri isə mövcud vaxt qrafikinin qəbul prosesinin ümumi planlaması ilə bağlı olduğunu qeyd edir.

Bəs görəsən buraxılış imtahanları niyə mart ayında keçirilir?

Təhsil eksperti Elmin Nuri bu barədə Sonxeber.az -a açıqlama verib:

"Son bir neçə ildir ki, ölkəmizdə buraxılış imtahanları mart ayında keçirilir və bu vaxt seçimi təsadüfi deyil. Əksinə, qəbul prosesinin mərhələli və planlı şəkildə həyata keçirilməsi baxımından bu tarix daha məqsədəuyğun hesab olunur. Çünki Azərbaycanda ali məktəblərə qəbul iki mərhələdən ibarətdir: buraxılış imtahanı və blok imtahanı. Üstəlik, hazırda Dövlət İmtahan Mərkəzi abituriyentlərə blok imtahanında ikinci şans imkanı da təqdim edir. Əvvəlki illərdə belə bir imkan yox idi - yalnız bir buraxılış və bir blok imtahanı keçirilirdi.

İndi isə əlavə şans imtahanı olduğuna görə bütün mərhələlərin vaxt baxımından düzgün planlaşdırılması xüsusi əhəmiyyət daşıyır. Bu prosesi ardıcıllıqla nəzərdən keçirdikdə məsələ daha aydın görünür.

Mart ayında buraxılış imtahanı keçirilir. Son illərdə test tapşırıqlarında açıq sualların sayı əvvəlki illərlə müqayisədə xeyli artıb və bu göstərici hər il yüksəlir. Açıq sualların çoxalması isə onların yoxlanılması prosesini daha uzun edir. Abituriyentlər buraxılış imtahanını verib nəticələrini gözlədikləri müddətdə blok imtahanının vaxtı da yaxınlaşır. Daha sonra blok imtahanı keçirilir və müəyyən müddətdən sonra onun nəticələri elan olunur. Bütün bu mərhələlər bir-biri ilə sıx bağlıdır və ciddi zaman planlaması tələb edir.

Təsəvvür edək ki, buraxılış imtahanı martın əvvəlində deyil, ortalarında keçirilsin. Bu halda bütün proses zəncirvari şəkildə gecikməyə başlayar. Buraxılış imtahanı gec keçirilərsə, nəticələrin açıqlanması da gecikər. Nəticələr gec açıqlansa, blok imtahanının birinci mərhələsi də daha gec baş tutar. Bunun ardınca blok imtahanının nəticələrinin elan olunması və ikinci şans imtahanının keçirilməsi də gecikər. Nəticədə ixtisas seçimi mərhələsi də xeyli gec başlayar və bütün qəbul prosesi demək olar ki, sentyabr ayına qədər uzanar.
Bu gün qəbul prosesində iştirak edən mütəxəssislər yaxşı bilirlər ki, buraxılış imtahanlarının martın əvvəlində keçirilməsinə baxmayaraq, bütün mərhələləri başa çatdırıb yekun nəticələri elan etmək bəzən avqustun sonlarına qədər uzanır. Çox vaxt qəbul nəticələri avqustun 20-dən sonra açıqlanır.

Bundan əlavə, qəbul olunan tələbələrin qarşısında başqa vacib mərhələlər də var. Ödənişli əsaslarla qəbul olan tələbələr Təhsil Tələbə Kredit Fonduna müraciət etməlidirlər ki, bu proses də müəyyən vaxt tələb edir. Regionlarda yaşayan tələbələrin paytaxta gələrək yerləşməsi, yataqxana və ya kirayə məsələlərini həll etməsi də əlavə vaxt aparır.

Bu səbəbdən məsələyə yalnız bir tərəfdən yanaşmaq düzgün olmaz. Buraxılış imtahanlarının mart ayında keçirilməsi geniş və çoxmərhələli qəbul prosesinin düzgün təşkil edilməsi üçün müəyyən edilmiş planın tərkib hissəsidir. Dövlət İmtahan Mərkəzi bu qərarı təsadüfi şəkildə verməyib. Bu tarix seçimi qəbul sisteminin bütün mərhələlərinin ardıcıl və problemsiz həyata keçirilməsi üçün məntiqi əsaslara söykənir".

Telegramda izləyin