Hun dövrünə aid əşyalar TAPILDI

Rusiya Federal Təhlükəsizlik Xidməti əməkdaşları tərəfindən "qara qazıntı aparanlar"dan müsadirə edilən qədim bürünc qazanlar Kurqan Dövlət Universitetinə region üzrə təhvil verilib.

Lent.az yerli mediaya istinadla bildirir ki, söhbət üç nadir tapıntıdan gedir: bu tip əşyaların bütün Avrasiya üzrə 10-dan çox nümunəsi məlumdur.

Universitet tarixçilərinin sözlərinə görə, qazanlar Hun dövrünə - Xalqların Böyük Köçü Dövrünə (eramızın IV-V əsrləri) aiddir. Bunlar ayaqlı, tökmə üsulla hazırlanmış bürünc məmulatlardır və çərçivə formalı tutacaqlara malikdir.

İki böyük nümunə əlavə naxış və bəzəklərlə işlənib, ən kiçik qazan isə üzərindəki his izlərinə və təmir əlamətlərinə əsasən məişətdə aktiv istifadə olunub.

Əsas maraqlı məqam onların aşkar edilmə üsuludur: qazanlar bir-birinin içində yerləşdirilmiş vəziyyətdə tapılıb.

Alimlərin fikrincə, onlar təhlükə anında gizlədilmiş ola bilər. Bu cür tapıntılar olduqca nadir sayılır və Xalqların Böyük Köçü Dövrü zamanı hunların Kurqan vilayəti ərazisindən keçən marşrutlarının öyrənilməsi üçün böyük əhəmiyyət daşıyır.

Kurqan Dövlət Universitetindən bildirilib ki, qeyri-qanuni qazıntı aparanların fəaliyyəti nəticəsində arxeoloji kontekst itirilib və bununla da elmi məlumatların bir hissəsi geri qaytarılması mümkün olmayan şəkildə məhv olub.

Buna baxmayaraq, mütəxəssislər icazə alaraq tapıntının aşkar edildiyi əraziyə getməyi və əlavə tədqiqatlar aparmağı planlaşdırırlar.

Hazırda alimlər qarşısında genişmiqyaslı ekspertiza vəzifəsi durur: metalın tərkibini müəyyənləşdirmək, his izlərini araşdırmaq, elmi təsvir hazırlamaq və artefaktların 3D modellərini yaratmaq.

Bütün prosedurlar başa çatdıqdan sonra unikal qazanların vilayət muzeyinə təhvil veriləcəyi gözlənilir və onlar arxeoloji ekspozisiyanın bir hissəsinə çevriləcək.

Telegramda izləyin