Gündüz vaxtı bankı soymağa cəhd etdi - VİDEO

Türkiyənin Mersin şəhərində bank filialına silahlı basqın cəhdinin qarşısı polis əməkdaşlarının operativ müdaxiləsi nəticəsində alınıb.

Sonxeber.az türk mediasına istinadən xəbər verir ki, üzünü maska ilə gizlədən şəxs bank filialına daxil olaraq qarət etməyə cəhd göstərib. Lakin bankın təhlükəsizlik əməkdaşları vəziyyəti vaxtında fərq edərək müdaxilə edib və şübhəli hadisə yerindən piyada qaçıb.

Mersin Vilayət Polis İdarəsindən bildirilib ki, Toroslar Rayon Polis İdarəsinə bağlı Narkotim və Cinayətlərin Qarşısının Alınması qrupları ərazidə profilaktik tədbirlər apardığı zaman bankda qarət cəhdi ilə bağlı məlumat daxil olub.

Dərhal hadisə yerinə cəlb olunan polis əməkdaşları qaçış istiqamətlərini nəzarətə götürərək genişmiqyaslı axtarış tədbirlərinə başlayıb. Aparılan əməliyyat nəticəsində B.D. adlı şübhəli şəxs istifadə etdiyi satır, maska və əlcəklərlə birlikdə saxlanılıb.

Gözaltına alınan şəxs barəsində polis bölməsində zəruri prosessual tədbirlər həyata keçirildikdən sonra məhkəməyə təqdim olunub. Məhkəmənin qərarı ilə o, həbs edilərək istintaq təcridxanasına göndərilib.

Faktla bağlı araşdırmalar davam etdirilir.

Telegramda izləyin