TDT lazımi səviyyəyə çatdıqdan sonra bu proseslər daha faydalı nəticələrə gətirib çıxara bilər

"Türk Dövlətləri Təşkilatı hələ yeni yaranıb. Əlbəttə ki, Azərbaycanın mərkəzdə yerləşməsi səbəbindən ölkənin potensialı digər dövlətlərlə müqayisədə daha qabarıq görünə bilər. Lakin bütün bu proseslərin həyata keçirilməsi üçün beynəlxalq şəraitin də buna imkan verməsi lazımdır".

Bunu Sonxeber.az-a açıqlamasında politoloq Samir Hümbətov bildirib.

O, bildirib ki, Azərbaycanın kifayət qədər infrastruktur imkanları var:

"Vaxtilə Qars dəmir yolu xəttinin çəkilməsi, hazırda isə Zəngəzur üzərindən TRİP layihəsinin həyata keçirilməsi ölkəmizin üstünlüklərindəndir. Bundan əlavə, Azərbaycanın təşkilatda nəqliyyat-kommunikasiya ilə yanaşı, enerji sahəsində də böyük potensialı var. Artıq bir sıra neft-qaz layihələri həyata keçirilib. Bakı-Tbilisi-Ceyhan, Bakı-Tbilisi-Ərzurum kəmərlərindən tutmuş Cənub Qaz Dəhlizinə qədər bütün bu layihələr Azərbaycanın potensial imkanlarıdır. Bu layihələr həm öz enerji resurslarımızın ixracına, həm də gələcəkdə digər ölkələrin enerji resurslarının daha geniş şəkildə beynəlxalq bazarlara çıxarılmasına imkan verir".

Politoloq bildirib ki, digər tərəfdən, Çin tərəfindən həyata keçirilən "Bir kəmər, bir yol" layihəsində əsas iştirakçılardan biri olduğumuz üçün Orta Dəhliz də mühüm amildir:

"Gələcəkdə nəqliyyat, kommunikasiya, logistika və yükdaşıma imkanlarının daha da genişlənəcəyini düşünürəm. Bu gün yeni dünya nizamı formalaşırsa və burada təşkilatlanma ön plana çıxırsa, Türk Dövlətləri Təşkilatı lazımi səviyyəyə çatdıqdan sonra bu proseslər daha mütəşəkkil və faydalı nəticələrə gətirib çıxara bilər. Azərbaycanın da burada rolu həm təşkilatın inkişafına müəyyən töhfələr verə, həm də regionda və region ölkələri ilə əməkdaşlıqda yeni perspektivlər yarada bilər".

Röyalə Xəyal

Telegramda izləyin