İbrahim Tatlısesin qızından duyğusal paylaşım: "Diləyim həmişə eynidir, ata"

Səhhətində yaranan problemlər səbəbilə xəstəxanaya yerləşdirilən məşhur sənətçi İbrahim Tatlıses ilə bağlı ailə üzvlərinin paylaşımları diqqət çəkməyə davam edir.

Sonxeber.az türk mediasına istinadən xəbər verir ki, bir neçə gün əvvəl infeksiya səbəbilə xəstəxanaya aparılan və ehtiyat tədbiri olaraq reanimasiyada müşahidə altında saxlanılan sənətçinin vəziyyətinin yaxşılaşdığı bildirilir. Bu müddətdə ailə üzvlərinin paylaşımları da izləyicilər tərəfindən maraqla qarşılanır.

Sənətçinin kiçik qızı Elif Eda Tatlıses atasının yanında çəkilmiş fotosunu paylaşaraq, "Keçən həftə də, bu gün də diləyim eynidir, ata. Birlikdə daha neçə illərimiz olsun" sözlərini yazıb. Paylaşım qısa zamanda çoxsaylı bəyənmə və dəstək mesajları toplayıb.

Sənətçinin digər övladlarının da xəstəxanaya getdiyi qeyd olunur. Qızı Dilan Çıtak Tatlıses atasının vəziyyətini öyrənən kimi xəstəxanaya yollananlar arasında olub.

Digər tərəfdən, oğlu Ahmet Tatlıses qatıldığı televiziya proqramında çətin günlər keçirdiyini bildirib. O, atasının xəstəxanaya yerləşdirildiyini mediadan öyrəndiyini, yaşadığı stress səbəbilə halının pisləşdiyini, hətta burun qanaması və beyin qanaması riski ilə üzləşdiyini deyib.

Qeyd edək ki, sənətçinin infeksiya göstəriciləri aşağı düşdükdən sonra öd kisəsi əməliyyatı olunacağı ilə bağlı iddialar da səsləndirilir. Xəstəxanadan verilən məlumata əsasən isə İbrahim Tatlısesin huşunun açıq olduğu, ürək və ağciyər funksiyalarının normal işlədiyi və ümumi vəziyyətinin yaxşı olduğu bildirilib.

Hazırda sənətçinin müalicəsi davam etdirilir və səhhəti həkimlərin nəzarəti altında saxlanılır.

Telegramda izləyin