"Təhsildə mərkəzləşmə bölgələr üçün ciddi risk yaradır" - AÇIQLAMA

"Valideynlərin övladlarını paytaxtın ali təhsil müəssisələrinə yönəltməsi, əslində, sadə bir seçim deyil, gələcəyə yönəlmiş kompleks bir strateji addımdır. Bu seçimin kökündə dayanan əsas amil Bakının təkcə təhsil mərkəzi deyil, həm də geniş imkanlar platforması kimi görünməsidir. Paytaxt universitetləri illərlə formalaşmış akademik ənənələri, zəngin maddi-texniki bazası və xarici əlaqələri ilə daha rəqabətədavamlı mühit vəd edir. Valideyn düşünür ki, övladı paytaxtda oxuyarkən həm müasir kitabxanalara və beynəlxalq tədbirlərə çıxış əldə edəcək, həm də tələbəlik illərindən etibarən əmək bazarının nəbzini tutaraq özünə karyera yolu açacaq. Şəhər həyatının gəncin dünyagörüşünə və sosial adaptasiyasına göstərdiyi təsir də bu tərəzinin paytaxt gözünü ağırlaşdıran mühüm detallardan biridir".

Bu sözləri Sonxeber.az-a təhsil eksperti Şəmsi Qoca danlışıb.

O, açıqlamasında qeyd edib ki, bu meyil regionlarda ali təhsilin inkişafı üçün ciddi sınaqlar yaradır:

"Ən istedadlı və yüksək ballı gənclərin kütləvi şəkildə Bakıya axın etməsi bölgə universitetlərində intellektual rəqabət mühitini zəiflədir və bir növ "beyin axını"na səbəb olur. Universitetlər ən yaxşı tələbələrini itirdikcə, yerli mühitdə yenilikçi ideyaların və elmi araşdırmaların sürəti də istər-istəməz ləngiyir. Bu yanaşma həm də regionlarda ixtisaslı kadr çatışmazlığını dərinləşdirir, çünki Bakıda təhsil alan gənclərin böyük əksəriyyəti sonradan geri dönmək əvəzinə, elə paytaxtda məskunlaşmağa üstünlük verir. Beləliklə, region universitetləri sadəcə yerli diplom verən müəssisələr statusunda qalmaq təhlükəsi ilə üzləşir ki, bu da ölkə daxilində təhsil balansının pozulmasına gətirib çıxarır.
Bölgə universitetlərini cəlbedici etmək üçün onları Bakıdakı ali məktəblərin kiçik surətinə çevirmək yox, hər birini konkret sahələr üzrə unikal mərkəzlər kimi inkişaf etdirmək lazımdır. Məsələn, kənd təsərrüfatı, turizm və ya dağ-mədən sənayesi kimi sahələrdə region universitetləri elə bir səviyyəyə çatmalıdır ki, paytaxt gənci keyfiyyətli ixtisas təhsili üçün Bakıdan bölgəyə getməkdə maraqlı olsun. Yalnız bu halda biz təhsildə mərkəzləşmənin qarşısını ala və bölgələrimizdə real intellektual canlanmaya nail ola bilərik".

Vüsalə İbrahimli

Telegramda izləyin