Qarışqalar nə qədər yaşayır? - Alimlərin cavabı

Qarışqalar kiçik və həssas canlılar olsa da, onların ömür uzunluğu mütləq qısa olmur.

Sonxeber.az xəbər verir ki, "DiscoverWildlife" nəşrinin yazdığına görə, bəzi qarışqalar cəmi bir həftə yaşayır, digərləri isə ev heyvanlarınızı belə geridə qoya biləcək qədər uzunömürlü olur.

Qara bağ qarışqasının işçi fərdi (steril dişi), təhlükəsiz yeraltı yuvasında gizlənərək 310-430 gün yaşaya bilər, hətta 1129 günə qədər yaşayan nümunələr də qeydə alınıb. Bununla belə, hər dəfə qida axtarışına çıxmaq düşmənə yem olmaq, yolunu azmaq və ya pis hava şəraitinə düşmək, hətta su ilə yuyulmaq riskini artırır.

"Uçan qarışqalar günü"ndə yuvanı tərk edən qanadlı erkəklər isə ən yaxşı halda bir gecə sağ qalır və onların əksəriyyəti növbəti günə çatmadan ölür. Onların bioloji vəzifəsi - kraliça ilə cütləşmək - yerinə yetirildikdən sonra, təkamül baxımından daha uzun yaşamağa ehtiyac qalmır.

Buna qarşılıq, kraliça koloniyanı saxlamaq üçün hər gün yüzlərlə yumurta qoymalıdır. O, heç vaxt təhlükəsiz yuvasını tərk etmir və buna görə də xeyli daha uzun yaşayır.

Təbiətdə kraliça qarışqanın ömrü ehtimal ki, 5-7 il olur, lakin laboratoriya şəraitində saxlanılan bir koloniyada kraliça 29 il yaşayıb ki, bu da indiyə qədər qeydə alınmış ən uzunömürlü həşərat rekordudur.(qaynarinfo)

Telegramda izləyin