Polis mağazadan qaçırdığı uşağı bıçaqlayan qadını öldürdü - VİDEO

ABŞ-ın Nebraska ştatında dəhşətli hadisə baş verib.

Sonxeber.az xarici mediaya istinadən xəbər verir ki, hadisə Omaha şəhərində yerləşən mağazalardan birində qeydə alınıb.

Məlumata görə, səhər saatlarında əlində iri mətbəx bıçağı olan qadının azyaşlı uşaqla birlikdə görüldüyü barədə polisə məlumat daxil olub və dərhal hadisə yerinə əməkdaşlar cəlb edilib.

Təhlükəsizlik kameralarına düşən görüntülərdə 31 yaşlı Noemi Guzmanın mağazadan bıçaq götürdükdən sonra alış-veriş arabasında olan 3 yaşlı uşağa yaxınlaşdığı görünür. Bildirilir ki, o, uşağın yanında olan şəxsi bıçaqla hədələyərək arabayla birlikdə mağazadan çıxarıb.

Şübhəlinin uşağı zorla qaçırdığı qeyd olunur. Hadisə yerinə çatan polis əməkdaşları qadını parkinq zonasında uşaqla birlikdə aşkar ediblər. Polisin dəfələrlə "bıçağı yerə qoy" çağırışına məhəl qoymayan qadının uşağa hücum edərək onun üz və əl nahiyəsindən xəsarət yetirdiyi bildirilir.

Bundan sonra iki polis əməkdaşı silahdan istifadə edərək şübhəlini zərərsizləşdirib. Ağır yaralanan qadına yerində tibbi yardım göstərilsə də, onun həyatını xilas etmək mümkün olmayıb.

Yaralanan 3 yaşlı uşaq xəstəxanaya çatdırılıb. Həkimlərin açıqlamasına görə, uşağın üz nahiyəsində ciddi kəsiklər olsa da, onun həyatı üçün təhlükə yoxdur.

Hadisə ilə bağlı, o cümlədən polis əməkdaşlarının güc tətbiqi məsələsi üzrə geniş araşdırma başladılıb. Todd Schmaderer bildirib ki, müdaxilə uşağın həyatını xilas etmək məqsədi daşıyıb və polis əməkdaşları qətiyyətli şəkildə hərəkət ediblər.

Telegramda izləyin