Depressiya ilə adi kefsizliyin fərqi nədir? - AÇIQLAMA

Müasir dövrdə "depressiyadayam" ifadəsi gündəlik danışıq dilində tez-tez işlədilir.

Lakin bir çox hallarda insanlar əslində qısa müddətli kefsizliklə klinik depressiyanı bir-birinə qarışdırır.

Bəs görəsən bu iki vəziyyət arasındakı fərqlər nələrdir?

Psixoloq G.Qədirli bu barədə Sonxeber.az -a açıqlama verib:

"Adi kefsizlik hər bir insanın yaşadığı təbii emosional haldır. Bu, adətən konkret səbəblərlə bağlı olur. Məsələn, uğursuzluq, mübahisə, yorğunluq və ya gündəlik stress. Kefsizlik qısamüddətli olur, insan diqqətini yayındıranda, istirahət edəndə və ya müsbət hadisə yaşadıqda yüngülləşir və keçib gedir. Yəni bu vəziyyətdə insanın həyat funksiyaları ciddi şəkildə pozulmur.

Depressiya isə daha dərin və davamlı psixoloji vəziyyətdir. Burada söhbət sadəcə əhvalın aşağı olmasından getmir. Ən azı iki həftə və daha uzun müddət davam edən ümidsizlik, maraq və zövq hissinin itməsi, enerjisizlik, yuxu və iştah pozuntuları, diqqət dağınıqlığı kimi əlamətlər müşahidə olunur. Ən önəmlisi isə depressiya insanın gündəlik həyatına: işinə, münasibətlərinə, özünə baxışına ciddi təsir edir.

Əgər insan uzun müddət səbəbsiz kədər, boşluq hissi yaşayırsa və bu vəziyyət həyatına təsir edirsə, bunu sadəcə "keçər" kimi qiymətləndirmək doğru deyil. Bu halda mütəxəssisə müraciət etmək vacibdir"

Telegramda izləyin