Ömrü 10 gün, qoparmağın cəzası bir maşın qiyməti

Türkiyənin Manisa şəhərində yerləşən Spil Dağı Milli Parkında ildə cəmi bir dəfə açan və yalnız 10 gün canlı qala bilən endemik Manisa laləsi çiçəkləyib.

Sonxeber.az türk mediasına istinadən xəbər verir ki, qısa ömürlü bu nadir çiçəklər hər il çoxsaylı ziyarətçinin marağına səbəb olur. Təbiətsevərlər Manisa laləsini yerində görmək və şəkillərini çəkmək üçün Spil dağına üz tuturlar.

Ziyarətçilərdən Erdal Arslan bildirib ki, bu lalələri görmək üçün dostları ilə birlikdə xüsusi olaraq milli parka gəliblər: "İldə bir dəfə açır. Təkcə onları görmək üçün belə gəlməyə dəyər. Möhtəşəm mənzərə var. Qətiyyən qoparmayın, çünki cəriməsi təxminən bir avtomobil qiyməti qədərdir. Bu da onun nə qədər qiymətli olduğunu göstərir".

Digər ziyarətçi Özcan Soydam isə çiçəkləri fotoşəkilə çəkmək üçün gəldiyini deyib: "Manisa üçün çox dəyərli bir güldür. İldə bir dəfə açır. Şəkilini çəkmək istədim. Budağında qalması daha gözəldir".

Səlahiyyətli qurumlar vətəndaşları xəbərdar edərək bildiriblər ki, lalələrin təbiətdən qoparılması bioloji müxtəlifliyə ciddi zərər vurur. Buna görə də yüksək məbləğdə inzibati cərimələr tətbiq olunur.

Qeyd edək ki, qorunan Manisa laləsini qoparmağın cəriməsi 2022-ci ildə 109 min 593 lirə, 2023-cü ildə 244 min 315 lirə, 2024-cü ildə 387 min 142 lirə, 2025-ci ildə 557 min 212 lirə olub. 2026-cı ildə isə bu rəqəm 699 min 245 lirəyə yüksəlib.

Telegramda izləyin