Süni intellektin yaratdığı təhlükələr nələrdir? - AÇIQLAMA

Süni intellekt texnologiyalarının sürətli inkişafı həyatın demək olar ki, bütün sahələrinə təsir göstərir. Gündəlik iş prosesindən təhlükəsizlik sistemlərinə qədər geniş istifadə olunan bu yeniliklər bir tərəfdən rahatlıq yaratsa da, digər tərəfdən yeni risklər də meydana çıxarır.

Xüsusilə son dövrlərdə kiberdələduzların süni intellektdən istifadə etməsi vətəndaşlar üçün ciddi təhlükəyə çevrilib. Saxta zənglər, səs və görüntü manipulyasiyaları, şəxsi məlumatların ələ keçirilməsi kimi hallar artıq dünyanın müxtəlif ölkələrində müşahidə olunur.

Bəs süni intellektin yaratdığı təhlükələr nələrdir və vətəndaşlar bu cür hallardan necə qorunmalıdır?

Mövzu ilə bağlı İT eksperti Elvin Abbasov Sonxeber.az-a açıqlamasında bildirib ki, bəzi kibercinayətkarlar süni intellekt vasitəsilə insanları aldadaraq onların şəxsi məlumatlarını ələ keçirir və maddi zərər vururlar.

Ekspertin sözlərinə görə, yaxın keçmişdə xarici ölkələrdə yaşlı insanlara ailə üzvlərinin adından saxta videolar göndərilirdi. Həmin görüntülərdə guya yaxınlarının qaçırıldığı və ya məktəb, universitet ödənişi üçün təcili pul lazım olduğu bildirilirdi. Nəticədə bir çox insan bu üsulla aldadılmışdı.

Onun sözlərinə görə, artıq oxşar halların Azərbaycanda da müşahidə olunması ehtimalı artır. Belə ki, dələduzlar süni intellekt vasitəsilə insanlara zəng edərək özlərini bank əməkdaşı və ya dövlət qurumu nümayəndəsi kimi təqdim edir, müxtəlif bəhanələrlə şəxsi məlumatlar tələb edirlər. Bu məlumatlara bank kartı rekvizitləri, şəxsiyyət vəsiqəsinin FİN kodu, seriya nömrəsi və digər həssas informasiyalar daxildir. Daha sonra isə həmin məlumatlardan istifadə edilərək vətəndaşların hesabları talanır.

Elvin Abbasov vətəndaşlara xəbərdarlıq edərək vurğulayıb ki, heç bir bank və ya dövlət qurumu telefon vasitəsilə şəxsi məlumat tələb etmir. Bu cür zənglər daxil olduqda vətəndaşlar dərhal danışığı sonlandırmalı, daha sonra həmin qurumun rəsmi əlaqə nömrəsinə özləri zəng edərək məlumatı dəqiqləşdirməlidirlər.

Ekspert əlavə edib ki, bankların və dövlət qurumlarının vətəndaşların şəxsiyyətini təsdiqləmək üçün kifayət qədər məlumat bazası mövcuddur. Buna görə də heç bir halda naməlum şəxslərə fərdi məlumatlar təqdim edilməməli, şübhəli zəng və mesajlara qarşı son dərəcə diqqətli davranılmalıdır.

Telegramda izləyin