İşsizlik insan psixologiyasına necə təsir edir? - AÇIQLAMA

İşsizlik təkcə iqtisadi problem deyil, eyni zamanda insanın psixoloji durumuna və özünü dərk etmə tərzinə birbaşa təsir edən ciddi sosial-psixoloji vəziyyətdir.

İnsan gündəlik həyatında rolunu, məqsədini və sosial dəyərini çox zaman işi vasitəsilə formalaşdırır.

Bəs görəsən işsizlik insan psixologiyasına necə təsir edir?

Psixoloq Gülsər Qədirli bu barədə Sonxeber.az -a danşıb:

"İşsizlik bir neçə istiqamətdə psixoloji problemlərə yol aça bilər. İlk növbədə insanlarda özünəinamın azalması müşahidə olunur. "Mən faydalı deyiləm", "cəmiyyətə lazım deyiləm" kimi düşüncələr tədricən formalaşaraq depressiv əhval-ruhiyyəyə səbəb ola bilər.

Eyni zamanda uzunmüddətli işsizlik stress və təşviş səviyyəsini artırır. Gələcək barədə qeyri-müəyyənlik insanı daimi gərginlikdə saxlayır. Bu vəziyyət yuxu pozuntuları, əsəbilik, diqqət dağınıqlığı və emosional sabitsizlik kimi əlamətlərlə özünü göstərə bilər.

Sosial baxımdan isə işsizlik insanın özünü cəmiyyətdən uzaqlaşdırmasına gətirib çıxara bilər. İnsan sosial çevrədən geri çəkilir, ünsiyyət azalır və tənhalıq hissi güclənir. Bu isə problemi daha da dərinləşdirən bir dövr yaradır.

Bəzi hallarda işsizlik ailə münasibətlərinə də mənfi təsir edir. Maddi çətinliklərlə yanaşı, emosional gərginlik də artdığı üçün ailə daxilində mübahisələr və anlaşılmazlıqlar çoxala bilər.

İşsizlik yalnız maddi gəlirin olmaması deyil, insanın psixoloji sabitliyini, sosial rolunu və özünə münasibətini sarsıdan kompleks bir vəziyyətdir. Bu səbəbdən belə hallarda psixoloji dəstək, sosial adaptasiya və motivasiyanın bərpası çox önəmlidir".

Telegramda izləyin