KİV: Ən pis ssenari artıq baş verib

ABŞ administrasiyasının son günlərdəki addımları onun diqqətini Ukrayna böhranından İrana qarşı müharibəyə yönəltdiyi bir vaxtda Avropa ölkələri ilə əməkdaşlıq etmək deyil, onları qınamaq və cəzalandırmaq niyyətində olduğunu sübut edir.

Oxu.Az xəbər verir ki, bu barədə "Politico" nəşri məlumat yayıb.

Bildirilib ki, Birləşmiş Ştatların Prezidenti Donald Tramp öz fikrini, əsasən, Ukraynada davam edən münaqişədən İrana qarşı hərbi əməliyyatlara yönəldib. Eyni zamanda, Ağ Ev liderinin İrana qarşı müharibədə dəstək vermədiklərinə görə Avropadakı NATO üzvü olan ölkələrdən narazılığı onları Vaşinqtondan asılılığı tezliklə azaltmağa sövq edir.

Qəzet vurğulayır ki, Tramp hökuməti ilə Avropadakı müttəfiqlər arasında yaranan ixtilaflar getdikcə barışmaz görünməyə başlayır. "Politico"nun təhlilinə əsasən, ABŞ dövlət başçısının Almaniya Kansleri Fridrix Mertsi tənqid etməsi, bu ölkədəki hərbi kontingentinin azaldılması planları, eləcə də Trampın aprelin 29-da Rusiya Prezidenti Vladimir Putinlə apardığı danışıq göstərir ki, o, hazırda Avropa ilə əməkdaşlıqdan çox, onu mühakimə etməkdə və bəlkə də, cəzalandırmaqda daha çox maraqlıdır.

Nəşrin qənaətinə görə, fərqli bir vaxtda bu hadisələrin hər biri Avropa paytaxtlarında böhran toplantılarına səbəb ola bilərdi. Lakin hazırda orada belə hesab edirlər ki, ən pis ssenari artıq baş verib və bəzi Avropa liderləri ABŞ ilə münasibətlərdəki mövcud vəziyyətə uyğunlaşmağa başlayıblar.

Telegramda izləyin