"Pullarınızın oğurlanmasını istəmirsizsə, mürəkkəb şifrələrdən istifadə edin" - HÜQUQŞÜNAS

Son illərdə texnologiyanın sürətli inkişafı ilə yanaşı kibercinayətlərin sayı da ciddi şəkildə artıb.

Sosial şəbəkələrin, internet bankçılığının və onlayn alış-veriş platformalarının geniş yayılması vətəndaşların şəxsi məlumatlarının oğurlanması, dələduzluq və kibertəhdidlərlə üz-üzə qalmasına səbəb olur.

Bəs kibercinayətlərin artdığı dövrdə vətəndaşlar hüquqlarını necə qoruya bilər? Mövzu ilə bağlı hüquqşünas açıqlama verib:

Mövzu ilə bağlı hüquqşünas Xanım Yusifova Sonxeber.az -a açıqlama verib:

"Vətəndaşlar şəxsi məlumatlarının qorunmasına xüsusi diqqət yetirməlidirlər. Bank kartı məlumatları, şəxsiyyət vəsiqəsinin şəkli, təsdiq kodları və şifrələr üçüncü şəxslərlə paylaşılmamalıdır. Çünki kiberdələduzlar ən çox insanların diqqətsizliyindən istifadə edirlər".

O bildirib ki, sosial şəbəkələrdə və ya mesaj vasitəsilə göndərilən şübhəli keçidlərə daxil olmaq təhlükəlidir:

"Bəzi hallarda vətəndaşlara bank və ya dövlət qurumu adından saxta mesajlar göndərilir. Şəxs həmin keçidə daxil olduqda məlumatları oğurlana bilər. Buna görə də linkin rəsmi mənbəyə aid olub-olmadığı mütləq yoxlanmalıdır.

Əgər vətəndaşın bank hesabından qanunsuz pul çıxılıbsa, şəxsi məlumatları yayılıbsa və ya onlayn dələduzluqla üzləşibsə, dərhal polisə və aidiyyəti qurumlara məlumat verilməlidir. Eyni zamanda bank hesabları bloklanmalı və bütün sübutlar: mesajlar, ekran görüntüləri, köçürmə qəbzləri saxlanmalıdır.

Azərbaycan qanunvericiliyində kibercinayətlərlə bağlı məsuliyyət nəzərdə tutulub və bu cür əməlləri törədən şəxslər cinayət məsuliyyətinə cəlb edilə bilərlər.

Mən vətəndaşlara mürəkkəb şifrələrdən istifadə etməyi, iki mərhələli təhlükəsizlik sistemini aktivləşdirməyi və yalnız rəsmi tətbiq və saytlardan istifadə etməyi tövsiyə edirəm".

Telegramda izləyin