Birləşmiş Ştatlar Tehranı nüvə proqramından tamamilə uzaqlaşdırmaq niyyətindədir

"Amerika Birləşmiş Ştatları İranla qarşıdurmada mövqeyini gücləndirərək bu ölkənin nüvə proqramı planına tamamilə son qoymaq niyyətindədir".

Oxu.Az xəbər verir ki, bunu Ağ Evin mətbuat katibinin müavini Anna Kelli deyib.

"Prezident Donald Trampın milli təhlükəsizlik qrupunun İranın nüvə cəhdlərini birdəfəlik dayandırmaq məqsədilə bütün vasitələrdən istifadə etdiyi hazırda daha aydın görünür", - deyə o, CNN telekanalına müsahibəsində bildirib.

Kelli, həmçinin əlavə edib ki, "Epik qəzəb" əməliyyatı ilə əldə edilən mühüm nəticələr ABŞ-nin gücünü artırır, İran isə gündən-günə zəifləməkdədir.

Cümə axşamı gecə saatlarında qeydə alınan qarşılıqlı zərbələrdən sonra Fars körfəzi regionunda vəziyyətin yenidən kəskinləşməsi müşahidə olunub. İranın rəsmi dövlət radiosu bildirir ki, insident ABŞ hərbi qüvvələrinin İran neft tankerinə zərbə endirməsi ilə başlayıb. "Tasnim" agentliyinin məlumatına əsasən, bu addıma cavab olaraq İslam Respublikası Hörmüz boğazı ərazisində ABŞ-nin üç esminesinə kamikadze dronlar və raketlərlə hücum edib. Eyni zamanda ABŞ Mərkəzi Komandanlığı (CENTCOM) idarə olunan raket esmineslərinə qarşı həyata keçirilən hücumu təsdiq edərək, İranın hərbi hədəflərinə qarşı cavab tədbirlərinin görüləcəyini bəyan edib.

Telegramda izləyin