Hamilə qadın hovuzda həyatını itirdi

Sakaryanın Sapanca rayonunda hoteldə faciə yaşanıb. Otelin hovuzunda halı pisləşən 35 yaşlı Elif Nur Olğun boğulma təhlükəsi keçirib. Xəstəxanaya çatdırılan qadının həyatını xilas etmək mümkün olmayıb.

Sonxeber.az türk mediasına istinadən xəbər verir ki, hadisə Kırkpınar Təpəbaşı məhəlləsində yerləşən oteldə baş verib. Məlumata görə, Elif Nur Olğun həyat yoldaşı ilə birlikdə qapalı hovuzda üzərkən qəfil özünü pis hiss edib və suda boğulma təhlükəsi ilə üzləşib. Həyat yoldaşı və otel əməkdaşları onu huşsuz vəziyyətdə hovuzdan çıxarıblar.

Hadisə yerinə çağırılan tibb işçilərinin ilkin müdaxiləsindən sonra xəstəxanaya aparılan qadın həkimlərin səylərinə baxmayaraq vəfat edib.

Ürək xəstəliyindən əziyyət çəkdiyi bildirilən Elif Nur Olğunun meyiti ölüm səbəbinin dəqiq müəyyənləşdirilməsi üçün Sakarya Təhsil və Araşdırma Xəstəxanasının morquna göndərilib.

Həmçinin Elif Nur Olğunun 3 aylıq hamilə olduğu açıqlanıb. Faktla bağlı araşdırma davam edir.

Telegramda izləyin