Boşanmalar niyə artır? - SOSİOLOQLAR AÇIQLADI

Son illərdə boşanmaların artması cəmiyyətdə ən çox müzakirə olunan sosial məsələlərdən birinə çevrilib. Bu mövzuda müxtəlif fikirlər səsləndirilir.

Bəzi insanlar boşanmaların əsas səbəbini ailə dəyərlərinə yad təsirlərdə görür, digərləri isə iqtisadi çətinliklər, psixoloji uyğunsuzluq və ünsiyyət problemlərinin daha önəmli rol oynadığını düşünür.

Bəs görəsən boşanmaların artmasında əsas səbəb nədir?

Mövzu ilə bağlı Sonxeber.az -a danışan sosioloqlar bildirirlər ki, ailə institutu zamanla dəyişən sosial proseslərin təsiri altındadır və boşanmalara yalnız bir səbəbdən yanaşmaq düzgün deyil:

'Ailə dəyərlərinə yad təsirlər" anlayışı müəyyən qədər nisbi məfhumdur. Çünki hər dövrün və hər cəmiyyətin ailə modeli fərqli olub. Lakin müasir dövrdə sosial şəbəkələrin təsiri, fərdiyyətçiliyin güclənməsi, sürətli həyat tərzi və xarici mədəniyyətlərin təsiri ailədaxili münasibətlərə müəyyən dəyişikliklər gətirib. İnsanların ailəyə baxışı əvvəlki nəsillərlə müqayisədə fərqlənib, şəxsi azadlıq və fərdi rahatlıq daha çox ön plana çıxmağa başlayıb.

Ancaq boşanmaların əsas səbəbini yalnız xarici və ya "yad" təsirlərlə əlaqələndirmək tam doğru olmaz. Araşdırmalar göstərir ki, ailədaxili ünsiyyətin zəif olması, qarşılıqlı hörmətin azalması, maddi problemlər, xəyanət, məişət zorakılığı və emosional anlaşılmazlıq boşanmaların ən əsas səbəbləri sırasında yer alır. Bir çox hallarda ailələr xarici təsirlərdən yox, daxildə həll olunmayan problemlərdən dağılır.

Digər vacib məqam isə insanların artıq problemli münasibətlərə əvvəlki kimi məcburi şəkildə davam etməməsidir. Xüsusilə qadınların iqtisadi və sosial baxımdan daha müstəqil olması onları zərərli münasibətlərdən çıxmağa daha meyilli edir. Bu da statistikalarda boşanma sayının artmasına təsir göstərən amillərdəndir.

Ailənin qorunması üçün yalnız ənənəvi dəyərlərin təbliği kifayət deyil. Paralel olaraq ailədaxili kommunikasiya mədəniyyəti, psixoloji hazırlıq, qarşılıqlı məsuliyyət hissi və emosional savadlılıq da inkişaf etdirilməlidir. Çünki ailəni uzunömürlü edən əsas faktor formal ənənələrdən çox, tərəflərin bir-birini anlama və birlikdə problem həll etmə bacarığıdır".

Telegramda izləyin