Farid Dahmane: WUF13 Afrika şəhərləşmə prioritetlərinin dünyaya çatdırılması üçün vacib platformadır

Dünyanın iqlim dəyişikliyinin təsirlərini aradan qaldırmağa çalışdığı kritik bir dönəmdə Ümumdünya Şəhərsalma Forumunun keçirilməsi xüsusi əhəmiyyət daşıyır.

"Report" xəbər verir ki, bunu Əlcəzairin Keniyadakı səfiri Farid Dahmane Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən nazirlərin dəyirmi masasında çıxışı zamanı bildirib.

O qeyd edib ki, bu tədbir həm də Afrika şəhərləşmə prosesinin prioritetlərini dünyaya təqdim etmək üçün ən uyğun və əhəmiyyətli platformadır:

"Əlcəzair bu fürsətdən istifadə edərək Yeni Şəhər Gündəliyinə, xüsusilə Dayanıqlı İnkişaf Məqsədi 11-ə (SDG 11) sadiqliyini bir daha vurğulayır. Biz inanırıq ki, bu sessiya Yeni Şəhər Gündəliyinə doğru əldə etdiyimiz nailiyyətləri nümayiş etdirmək üçün mühüm bir mərhələdir".

Onun sözlərinə görə, Əlcəzair müxtəlif kateqoriyalardan və icmalardan olan bütün əhali qruplarını əhatə edən mənzil layihələri vasitəsilə insanların rifahının yaxşılaşdırılması üçün fasiləsiz şəkildə çalışıb:

"Biz həm qeyri-formal məskunlaşmaların və qeyri-qanuni yaşayış sahələrinin aradan qaldırılması, həm də kənd yerlərindən şəhərlərə qeyri-zəruri köçlərin minimuma endirilməsi istiqamətində fəaliyyət göstəririk. Əlcəzair 2025-ci ildən etibarən genişmiqyaslı mənzil layihəsinə başlayıb, yenidən yerləşdirmə proqramları vasitəsilə qeyri-formal yaşayış məntəqələrinin ləğvi istiqamətində işlər görülüb".

Səfir deyib ki, Əlcəzair mənzil yığımları və dövlət tərəfindən birbaşa subsidiyaların verilməsi ilə bağlı digər qanunlar da tətbiq edib:

"Bu subsidiyalar xüsusilə kənd təşəbbüsləri üçün 5-7 min dollar arasında dəyişir. Bütün bu tədbirlər mənzil qiymətlərinin aşağı salınmasına və təxminən 95 %-ə qədər kredit və faiz yükünün azaldılmasına yönəlmiş fondlar vasitəsilə həyata keçirilir. Bu layihə və təşəbbüslərin hamısı ümumi inkişaf məqsədləri ilə uzlaşır"

Telegramda izləyin