Mağazanın önündə tapdığı pişiklə hər gün qucaqlaşır - VİDEO

Türkiyənin Rize vilayətinin Ardeşen rayonunda məişət əşyaları mağazası işlədən Ferhat Hayat ilə sahibləndiyi pişik arasındakı bağ sosial şəbəkələrdə maraq doğurub. Balaca vaxtı mağazasının qapısında tapdığı pişiyi himayəsinə götürən mağaza sahibi ilə heyvan arasında yaranan münasibət diqqət çəkib.

Sonxeber.az xarici mediaya istinadən xəbər verir ki, təxminən 1 il əvvəl iş yerini ilk açdığı günlərdə qapısının önündə halsız vəziyyətdə pişik balası görən Ferhat Hayat heyvanı içəri alaraq ona qulluq edib. Baytar müayinəsi və müalicəsindən sonra sağlamlığına qovuşan pişik zamanla mağazanın ayrılmaz hissəsinə çevrilib.

Hər gün eyni saatda mağazaya gələn pişik kassanın olduğu hissəyə tullanaraq pəncələrini Ferhat Hayatın boynuna dolayır və onu qucaqlayır. Həmin anların görüntüləri sosial şəbəkələrdə böyük maraq görüb.

Ferhat Hayat pişiklə aralarındakı bağı belə izah edib:

"Bir gün kassanın üstündə idi. Heç bir səbəb olmadan göz-gözə gəldik. Qollarımı açanda birdən boynuma atıldı. Həmin gündən sonra hər dəfə qollarımı açanda gəlib boynuma sarılır."

Pişiyin günün böyük hissəsini mağazada keçirdiyini deyən Ferhat Hayat bildirib:

"Mağazanı ilk açdığımız vaxtlarda ovuc içi boyda idi. Gözlərini yeni açmışdı və anası yox idi. Biz də içəri götürdük. Təxminən 1 ildir bizimlə yaşayır. Hər səhər eyni saatda gəlir. Mağazanı bizimlə açıb bizimlə bağlayır. Xəstələnəndə də baytara aparıb müalicə etdirmişəm."

Telegramda izləyin