Bütün zamanların ən yaxşı romanı seçildi

Hansı romanın qlobal sorğuda bütün dövrlərin ən görkəmli bədii əsəri seçildiyi bəzilərini təəccübləndirə bilər. Tanınmış yazıçılar, ədəbi tənqidçilər və tədqiqatçılar dünya ədəbiyyatı tarixinin ən böyük əsəri hesab etdikləri romanı seçiblər.

Lent.az xarici mediaya istinadla xəbər verir ki, reytinqin lideri Ceyn Ostin, Şarlotta Bronte və ya Lev Tolstoyun qələmindən çıxmayan bir kitab olub.

Reytinq necə tərtib olunub?

Siyahının yaradılması üçün təşkilatçılar dünyanın dörd bir tərəfindən 170-dən çox müəllif, ədəbiyyatşünas və tənqidçi arasında sorğu keçiriblər. Hər bir iştirakçıya bütün dövrlərin ən yaxşı on bədii əsərindən ibarət şəxsi siyahısını tərtib etmək təklif olunub.

Səsvermədə iştirak edənlər arasında Stiven Kinq, İen Renkin, Buker mükafatı laureatı Bernardin Evaristo və yazıçı Riçard Osman da olub.

Sorğunun nəticələrinə əsasən, ən yaxşı 10 romanın siyahısı belədir:

1-ci yer - "Midlmarç" (Middlemarch), Corc Eliot;

2-ci yer - "Sevimli" (Beloved), Toni Morrison;

3-cü yer - "Uliss" (Ulysses), Ceyms Coys;

4-cü yer - "Mayaka doğru" (To the Lighthouse), Virciniya Vulf;

5-ci yer - "İtirilmiş zamanın sorağında" (In Search of Lost Time), Marsel Prust;

6-cı yer - "Anna Karenina", Lev Tolstoy;

7-ci yer - "Hərb və Sülh", Lev Tolstoy;

8-ci yer - "Ceyn Eyr" (Jane Eyre), Şarlotta Bronte;

9-cu yer - "Qürur və Qərəz" (Pride and Prejudice), Ceyn Ostin;

10-cu yer - "Madam Bovari" (Madame Bovary), Qustav Flober.

Oxucuları təəccübləndirən nəticələr

Ceyn Ostin və Şarlotta Brontenin klassik romanlarının ilk onluğun sonuna yaxın qərarlaşması ingilis ədəbiyyatının bir çox pərəstişkarı üçün gözlənilməz olub.

Bununla yanaşı, Lev Tolstoy reytinqin ilk onluğuna eyni anda iki əsəri daxil olan yeganə müəllif olub.

Layihə haqqında nə məlumdur?

Yüz romanı əhatə edən siyahının tam versiyası artıq internetdə dərc olunub. İstifadəçilər reytinqdəki kitablardan neçəsini oxuduqlarını yoxlaya, nəticələrini dostları ilə müqayisə edə və sorğunun konkret iştirakçılarının hansı kitabları seçdiyini görə bilərlər.

Bundan əlavə, təşkilatçılar tədqiqatın yekunlarına həsr olunmuş açıq diskussiya elan ediblər. Bu görüş mayın 19-da Konvey-Hollda (Conway Hall) kitab klubu formatında keçiriləcək və canlı yayımlanacaq.

Görüşün moderatorları "The Guardian" qəzetinin kitab şöbəsinin redaktorları Şarlotta Kortedj və Liza Spenser olacaqlar.

Müzakirədə həmçinin Elif Şafak, Qay Qunaratne, Keyt Moss və Bleyk Morrison kimi tanınmış yazıçılar da iştirak edəcəklər. Onlar ədəbiyyat tarixində ən böyük romanı hansı meyarlara əsasən müəyyən etməyin mümkün olduğunu müzakirə etməyi planlaşdırırlar.

Telegramda izləyin