Günəş əslində sarı deyil: Həqiqi rəngi görmək üçün atmosferdən çıxmaq lazımdır

Yer üzündən hər gün sarı disk kimi gördüyümüz Günəş əslində kosmosda tamamilə fərqli görünür - ağ rəngdə. Bu nəticə işığın fizikası ilə bağlı izahlara əsaslanır və göstərir ki, bizə tanış olan rəng ulduzun öz xüsusiyyəti deyil, Yer atmosferinin təsirinin nəticəsidir.

Qaynarinfo xəbər verir ki, bu barədə "Space Daily" nəşri yazır.

Astrofiziklərin sözlərinə görə, işığın səpələnməsinə səbəb olan atmosfer olmadıqda, açıq kosmosda Günəş ağ görünür. Beynəlxalq Kosmik Stansiyada çalışan astronavtlar və Ay səfərlərində iştirak etmiş "Apollo" missiyalarının üzvləri onu məhz bu cür müşahidə ediblər.

Alimlər Günəşin Yer üzündən niyə "saraldığını" da izah edirlər. Bu effekt Reyli səpələnməsi adlanan fiziki hadisə ilə bağlıdır. Məhz bu proses səmanın mavi görünməsinə səbəb olur. Günəş işığı atmosferdən keçərkən hava molekulları qısa dalğalı mavi işığı daha güclü səpələyir, uzun dalğalı sarı və qırmızı şüalar isə müşahidəçiyə daha asan çatır.

Nəticədə Günəşdən gələn birbaşa işıq mavi spektrin bir hissəsini itirir və ulduz bizə sarımtıl, hətta üfüqə yaxın olduqda narıncı rəngdə görünür.

Fizika baxımından Günəş görünən işıq spektrinin bütün rənglərini yayır. Onun səth temperaturu təxminən 5800 kelvin təşkil edir. Bu rənglərin cəmi insan gözü tərəfindən neytral ağ işıq kimi qəbul olunur.

Astronomlar Günəşi G2V tipli "sarı cırtdan" kimi təsnif etsələr də, bu termin onun rəngini deyil, temperatur və parlaqlıq üzrə elmi təsnifatdakı yerini ifadə edir.

Fiziklərin sözlərinə görə, mavi səma və "sarı" Günəş eyni prosesin iki fərqli təzahürüdür. Atmosfer Günəşin özünü dəyişdirmir, sadəcə onun işığını müşahidə istiqamətindən asılı olaraq müxtəlif şəkildə süzür.

Kosmosdan baxdıqda, atmosferin yaratdığı bu "filtr" aradan qalxır və optik illüziya yox olur. Nəticədə Günəş öz təbii ağ rəngində görünür.

Telegramda izləyin