Bir vaxtlar evlilik proqramlarının məşhur iştirakçısı indi dinlə məşğuldur

Türkiyədə bir dövrün ən çox müzakirə olunan evlilik proqramlarının tanınmış iştirakçılarından olan Birkan Key ekranlardan uzaqlaşdıqdan sonra həyatında ciddi dəyişikliklər edib. Televiziya proqramlarının yayımının dayandırılmasından sonra ictimaiyyət qarşısında görünməyən Key həm biznes fəaliyyətinə başlayıb, həm də mənəvi dəyərlərə daha çox önəm verməyə başlayıb.

Sonxeber.az xarici mediaya istinadla xəbər verir ki,televiziyada tanındıqdan sonra adı bir müddət hüquq-mühafizə orqanlarının keçirdiyi əməliyyatla gündəmə gələn Birkan Key həmin vaxt saxlanılsa da, aparılan araşdırmalar və hüquqi prosedurlar nəticəsində onun günahsız olduğu müəyyən edilib. Bundan sonra sərbəst buraxılan keçmiş iştirakçı həyatında yeni səhifə açıb.

Yaşadığı çətin dövrü arxada qoyan Key tamamilə fərqli sahəyə üz tutaraq manqal kömürü istehsalı biznesinə başlayıb. O, yeni fəaliyyət sahəsində öz əməyinə əsaslanan iş quraraq ticarətlə məşğul olmağa başlayıb.

Bununla yanaşı, Birkan Key sosial şəbəkə hesablarında daha çox dini və mənəvi məzmunlu paylaşımlar edir. Onun televiziya və şou-biznes mühitindən uzaqlaşaraq daha sadə həyat tərzi seçməsi izləyicilərin diqqətini cəlb edib.

Sosial şəbəkə istifadəçiləri keçmiş televiziya simasının bu dəyişimini maraqla izləyir və onun həyatındakı dönüşü "haradan haraya" sözləri ilə qiymətləndirirlər.

Telegramda izləyin