Turistlər getdikcə gecə həyatını seçirlər: Səbəb nədir?

Son illərdə müşahidə olunan ekstremal istilər turistlərin istirahət vərdişlərini dəyişməyə başlayıb. Bir qisim səyahətçilər yay mövsümündə səyahətdən imtina edir, digərləri isə daha sərin istiqamətlərə üz tutur. Lakin Aralıq dənizi ölkələrində yay tətilindən vaz keçmək istəməyənlər də var və onlar problemi fərqli şəkildə həll edirlər.

Qaynarinfo "BBC Travel"ə istinadən xəbər verir ki, Avropada temperatur artdıqca turistlər günün ən isti saatlarını qapalı keçirir və səyahətin ən maraqlı anlarının gün batımından sonra başladığını kəşf edirlər.

Səyahətçi Deyn Maksvell İspaniyanın Sevilya şəhərinə səfərinin güclü istilər səbəbilə çətinliklə başladığını, lakin sonradan rejimi dəyişməyin hər şeyi xilas etdiyini deyir: "Biz yerli ritmə uyğunlaşdıq".

Bu, gec yatmaq, günorta saatlarına qədər yuxuda qalmaq, isti pik saatlarda qapalı məkanda olmaq və yalnız axşam 20:00-dan sonra şəhərə çıxmaq demək idi. Maksvellin sözlərinə görə, gecə saatlarında şəhər tamamilə fərqli görünürdü: küçələr canlı idi, lakin sakit idi, kafelər və tapas barlar isə ən aktiv dövrünü yaşayırdı.

O, artıq dostları ilə birlikdə "gecə turizmi"ni üstün tutduqlarını bildirir. Onun fikrincə, gündüz saatlarında səyahət həm narahat, həm də sağlamlıq üçün risklidir.

"InteleTravel" (Böyük Britaniya və İrlandiya) turizm şirkətinin icraçı direktoru Trişa Hendli-Hyuz da bu tendensiyanı təsdiqləyir: "Biz gecə turizminə doğru real dəyişiklik görürük. Səyahətçilər günorta istisindən qaçır və izdihamı azaltmaq üçün gec saatlarda şəhərləri kəşf edirlər. Ənənəvi 10:00-16:00 tur saatları yerini ulduzları izləməyə, gecə bazarlarına və ay işığında ekskursiyalara verir".

Avropanın bir çox şəhərlərində artıq turistlərin yeni davranışlarına uyğunlaşma müşahidə olunur. Məsələn, Sevilyada yay temperaturu 36°C-yə çatır və şəhər həm yerli əhali, həm də turistlər üçün şəraiti yaxşılaşdırmağa çalışır.

Şəhərin tarixi mərkəzində kölgəlik örtüklər quraşdırılıb, 2039-cu ilə qədər isə təxminən 100 min ağac əkilməsi planlaşdırılır. Bundan başqa, 2022-ci ildə "CartujaQanat" layihəsi çərçivəsində yeraltı kanallar, kölgəli ictimai sahələr və su buxarlanması sistemi ilə açıq məkanların temperaturunun 10°C-yə qədər azaldılması hədəflənib.

Lakin yerli sakinlər üçün ənənəvi həll hələ də "siesta"dır.

"Siesta yalnız istirahət üçün deyil, həm də istidən qorunmaq üçündür. Saat 16:00-da temperatur 40°C-yə çata bilər və bu vaxt çöldə olmaq çox çətindir", deyə Sevilya meriyasının əməkdaşı Saida Sequra bildirib.

Onun sözlərinə görə, şəhər yayda dayanmasa da, ritm dəyişir: "Hər şey davam edir, sadəcə bir qədər gec başlayır".

Şəhərə köçmüş Böyük Britaniya vətəndaşı Bekki Rendell isə axşamlar çay kənarında təşkil olunan gecə pikniklərini xüsusi qeyd edir.

Avstraliyalı səyahətçi Tamara Riçardson bildirir ki, gec saatlar bütün yaş qrupları üçün daha rahatdır: uşaqlar parkda oynayır, böyüklər isə gecəyə qədər sosial həyatı davam etdirirlər.

Roma və Afina kimi digər Avropa şəhərləri də bu dəyişikliklərə uyğunlaşır. Romada yay aylarında tədbirlər daha çox axşam saatlarında keçirilir, restoranlar və muzeylər gec saatlara qədər açıq qalır.

Afina isə günün ən isti saatlarında Akropolu bağlayır, lakin axşam saatlarında turistlər üçün daha rahat və sakit ziyarət imkanı yaradır.

Yerli sakinlər qeyd edirlər ki, şəhər artıq "iki hissəli gün rejimi" ilə yaşayır: səhər aktivlik, günorta istirahət və axşam yenidən canlanma.

Nəticə olaraq, ekspertlər hesab edir ki, iqlim dəyişikliyi turist davranışlarını köklü şəkildə dəyişir və səyahətçilər getdikcə yerli ritmə uyğunlaşaraq şəhərləri fərqli formada kəşf edirlər.

Telegramda izləyin