Tükənmişliyə qarşı 5 qızıl tövsiyə

Sosial şəbəkələrin yaratdığı təzyiq, gərgin iş qrafiki və gündəlik həyatın məsuliyyətləri bir çox insanın özünü tükənmiş hiss etməsinə səbəb olur.

Sonxeber.az xəbər verir ki, mütəxəssislər daha sakit və balanslı həyat tərzi üçün bir neçə vacib məsləhət veriblər. Bildirilib ki, son dövrlər xüsusilə yay aylarında "mindfulness" - yəni şüurlu fərqindəlik vərdişlərinə maraq artıb.

Psixoterapevtlər qeyd edib ki, insanların həm şəxsi, həm də peşəkar həyatda yaşadığı tükənmişlik hissi onları gündəlik vərdişlərini yenidən gözdən keçirməyə sövq edir.

Mütəxəssislər tükənmişliyin qarşısını almaq üçün aşağıdakı tövsiyələri verirlər:

1. Açıq havada daha çox vaxt keçirin

Araşdırmalar göstərir ki, təbiətlə təmas insanlarda rahatlıq hissini artırır, stress səviyyəsini azaldır və sinir sisteminin daha sağlam fəaliyyətinə kömək edir.

2. Ekran vaxtını azaldın

Sosial mediada davamlı xəbər və məlumat axını insanın zehni yorğunluğunu artırır. Xüsusilə səhər saatlarında telefondan uzaq qalmaq və günü daha sakit başlamaq tövsiyə olunur.

3. Bədəninizin siqnallarını dinləyin

Mütəxəssislər insanların özlərinə "Daha çox su içməliyəm?", "İstirahətə ehtiyacım var?", "Hərəkət etməliyəm?" kimi suallar verməsinin vacib olduğunu bildirirlər. Düzgün qidalanma, keyfiyyətli yuxu və fiziki aktivlik də önəmli amillər sırasındadır.

4. Şükür etməyi vərdişə çevirin

Hər gün minnətdar olduğunuz üç şeyi yazmaq və ya gün ərzində yaşadığınız xoş hadisələri xatırlamaq ruh halına müsbət təsir göstərir. Araşdırmalara görə, bu vərdiş həyat məmnuniyyətini artırır.

5. Duyğularınıza vaxt ayırın

Loş işıqda sakitləşdirici musiqi dinləmək, xoş qoxular hiss etmək, sevdiklərinizlə vaxt keçirmək və ya bir fincan qəhvə ilə dincəlmək gündəlik stressi azaltmağa kömək edə bilər.

Mütəxəssislər hesab edirlər ki, kiçik dəyişikliklər belə insanların həm fiziki, həm də psixoloji sağlamlığına müsbət təsir göstərə bilər.(axsam.az)

Telegramda izləyin