Atasından qalan torpaq sahəsini təklif edilən heç bir qiymətə satmır, səbəb görün nədir - VİDEO

Türkiyənin Osmaniye şəhərində bir vətəndaş ata-baba torpağına sahib çıxaraq nümunəvi addımı ilə diqqət çəkib. Ətrafı çoxmərtəbəli yaşayış binaları ilə əhatələnmiş 10 dönümlük torpaq sahəsini satmaqdan imtina edən şəxs, hər il olduğu kimi bu il də əkin apararaq məhsulunu yığıb.

Sonxeber.az xarici mediaya istinadla xəbər verir ki,, sürətli şəhərləşmənin və tikinti bumunun davam etdiyi bir dövrdə Osmaniyenin mərkəzində yerləşən torpaq sahəsinin sahibi, ərazini tikinti şirkətlərinə vermək əvəzinə kənd təsərrüfatı məqsədilə istifadə etməyə üstünlük verib.

Bütün cəlbedici təkliflərə baxmayaraq, ata mirasını satmaq istəmədiyini bildirən torpaq sahibi qərarının səbəbini belə izah edib:

"İstəmirəm ki, kimsə desin ki, atamdan qalan malı satdım".

Atasından qalan torpağı qorumağı özünə borc bilən vətəndaş uzun illərdir əkinçilik fəaliyyətini davam etdirir. Hündürmərtəbəli binaların əhatəsində yerləşən 10 dönümlük sahədə bu il də əkin aparan fermer mövsümün məhsulunu uğurla yığaraq ənənəsini davam etdirib.

Onun ata-baba mirasına göstərdiyi sədaqət sosial şəbəkələrdə və yerli ictimaiyyətdə təqdirlə qarşılanıb.

Telegramda izləyin