Milçəklər ayaqları ilə çeynəyirlər - niyə onları ovlamaq çətindir?

Əlinizi milçəyə tərəf qaldırırsınız, amma o, bir göz qırpımında uçub gedir. Çoxlarına elə gəlir ki, milçək zərbəni əvvəlcədən hiss edir. Əslində isə bunun səbəbi tam başqadır. Alimlərin fikrincə, milçəklər ətraf aləmi insanlardan xeyli fərqli qəbul edir və buna görə təhlükədən çox sürətlə yayınırlar.

Lent.az xəbər verir ki, mütəxəssislərin məlumatına görə, milçəklərdə işıq siqnallarını qəbul etmə sürəti saniyədə təxminən 250 kadrdır.

İnsanlarda isə bu göstərici orta hesabla 50 kadr təşkil edir. Bu səbəbdən milçək insanın əl hərəkətini sanki yavaş çəkilişdə izləyir və təhlükə yaxınlaşmadan əvvəl qaçmağa vaxt tapır.

Bundan əlavə, milçəklərin fasetli gözləri onlara demək olar ki, 360 dərəcəlik görüntü imkanı verir. Bu xüsusiyyət yaxınlaşan təhlükəni demək olar ki, hər istiqamətdən görmələrinə şərait yaradır.

Milçəklər qidanın dadını ayaqları ilə yoxlayır
Milçəklərin ən maraqlı xüsusiyyətlərindən biri də dad reseptorlarının ayaqlarında yerləşməsidir. Onların pəncələrindəki dad reseptorları insan dilindəkilərdən təxminən 10 dəfə daha həssas hesab olunur. Buna görə milçək qidanın üzərinə qonaraq əvvəlcə onun dadını "yoxlayır", yalnız sonra qidalanmağa başlayır. Məhz buna görə milçəklər müxtəlif əşyaların, meyvələrin, yeməklərin və digər səthlərin üzərinə tez-tez qonurlar. Onlar sanki qidanı dadaraq qiymətləndirirlər.

Milçəyi necə daha asan tutmaq olar?
Mütəxəssislər bildirirlər ki, milçəyi vurmaq üçün qəfil və geniş hərəkətlər etmək effektiv deyil. Çünki o, hərəkəti dərhal hiss edir. Bunun əvəzinə milçəköldürəni və ya digər vasitəni yavaş-yavaş, yan tərəfdən yaxınlaşdırmaq daha uğurlu nəticə verə bilər. Yapışqan lentlərdən istifadə etmək də təsirli üsullardan sayılır. Həmçinin axşam saatlarında milçəklərin fəaliyyəti zəiflədiyi üçün onları tutmaq gündüzlə müqayisədə daha asan olur.

Milçəklər qidaları necə yeyir?
Milçəklər bərk qidaları birbaşa çeynəyə bilmirlər. Onlar əvvəlcə qidanın üzərinə həzm fermentləri ilə zəngin tüpürcək ifraz edərək bərk hissəcikləri mayeləşdirirlər. Daha sonra əmələ gələn mayeni xortumu vasitəsilə soraraq qidalanırlar. Məhz buna görə milçəyin yeməyin üzərinə qonmasına icazə vermək tövsiyə olunmur. Çünki bu proses zamanı müxtəlif bakteriyalar qidaya keçə bilər.

Milçəklər niyə təhlükəli hesab olunur?
Milçəklər zibil qutuları, tullantılar və çirkli səthlərlə təmasda olduqları üçün milyonlarla bakteriya və müxtəlif mikroorqanizmləri daşıya bilirlər. Bu səbəbdən açıq qidaların üzərinə qonmaları bəzi infeksiyaların yayılması riskini artırır. Bununla yanaşı, milçəklər təbiətdə mühüm rol oynayırlar. Onlar bir çox balıq və digər heyvan növləri üçün qida mənbəyidir, eyni zamanda bəzi bitkilərin tozlanmasına da kömək edirlər.

Milçəklər niyə ayaqlarını bir-birinə sürtür?

Alimlərin fikrincə, milçəklər ayaqlarındakı dad reseptorlarını əvvəlki qida qalıqlarından təmizləmək üçün onları bir-birinə sürtürlər. Bu, yeni qidanın dadını daha dəqiq hiss etmələrinə kömək edir.

Milçəklər niyə insanların üzərinə qonmağı sevir?

Onları əsasən insan tərinin qoxusu və dəridən ayrılan maddələr cəlb edir. Bu ifrazatlar milçəklər üçün duz və zülal mənbəyi hesab olunur.

Telegramda izləyin