""Son zəng"də bədii və mənəvi dəyərlər ön plana çıxarılmalıdır" - AÇIQLAMA

"Son illər "Son zəng" tədbirlərinin forması və miqyası cəmiyyətdə ciddi müzakirə mövzusuna çevrildiyi üçün Elm və Təhsil Nazirliyi bu prosesi tənzimləmək məqsədilə hər il xüsusi əmr imzalayır və məktəblər qarşısında konkret tələblər qoyur".

Bunu Sonxeber.az-a təhsil eksperti Şəmsi Qoca danışıb.

O, açıqlamasında qeyd edib ki, bu qaydalara əsasən, məktəblər və təhsil qurumları məzuniyyət tədbirlərinin təşkilində aşağıdakı prinsiplərə və qadağalara mütləq şəkildə əməl etməlidirlər:

"Tədbirlər yalnız ümumi təhsil müəssisəsinin ərazisində - məktəbin həyətində, idman və ya akt zalında təşkil oluna bilər. Məktəbdən kənarda, xüsusilə restoranlarda, şadlıq saraylarında, istirahət mərkəzlərində və ya kafelərdə "Son zəng" adı altında hər hansı kütləvi məclisin keçirilməsi qətiyyən yolverilməzdir. Tədbirin müddəti də məhdudlaşdırılır; adətən onun 1-2 saat ərzində başa çatdırılması tələb olunur və tədbir, bir qayda olaraq, günün birinci yarısında keçirilir.

Valideynlər üçün süni maliyyə yükü yaradan halların qarşısı qətiyyətlə alınmalıdır. Tədbirin təşkili və bəzədilməsi, müəllimlərə baha dəyərli hədiyyələrin alınması və ya məzunlar üçün xüsusi, bahalı geyimlərin (məsələn, eyni növ bahalı kostyumların, xüsusi dizaynlı donların) sifariş edilməsi məqsədilə pul yığılması qəti qadağandır. Məzunlar tədbirə məktəbli forması ilə qatılmalıdırlar ki, bu da sosial bərabərliyin qorunmasına və şagirdlər arasında maddi təbəqələşmənin nümayişinin qarşısının alınmasına xidmət edir.

Məktəb rəhbərliyi, pedaqoji heyət və valideyn komitələri birgə məsuliyyət daşıyırlar. Direktorlar tədbir zamanı şagirdlərin təhlükəsizliyini, ictimai asayişi və tibbi təhlükəsizlik qaydalarına əməl olunmasını tam təmin etməlidirlər. Xüsusilə son illər ən böyük təhlükələrdən birinə çevrilən "avtomobil karvanları" məsələsinə nəzarət gücləndirilməlidir. Məktəb rəhbərliyi və valideynlər azyaşlı və ya sürücülük vəsiqəsi olmayan, təcrübəsiz məzunların sükan arxasına əyləşərək şəhərdə təhlükəli yürüşlər təşkil etmələrinə icazə verməməli, bu barədə hüquq-mühafizə orqanları ilə koordinasiyalı şəkildə işləməlidirlər.

"Son zəng"in mahiyyəti dəyişdirilməli, onun bədii və mənəvi tərəfi ön plana çıxarılmalıdır. Tədbir şou-biznes xarakterli təmtəraqlı konsert proqramı deyil, məktəb illərinin xoş xatirələrini canlandıran, şagirdlərin müəllimlərə ehtiramını, vətənpərvərlik mövzularını, elmi və yaradıcı uğurlarını əks etdirən estetik bir mərasim olmalıdır. Bu qaydalara əməl olunması həm neqativ halların qarşısını alır, həm də təhsil müəssisəsinin nüfuzunu qoruyur".

Vüsalə İbrahimli

Telegramda izləyin