Bodrumda itkin düşən hollandiyalı turist tapıldı - VİDEO

Türkiyənin Muğla vilayətinin Bodrum rayonunda ailəsi ilə istirahətə gələn 62 yaşlı Hollandiya vətəndaşı Henricus Theodorus itkin düşdükdən sonra polis və yerli sakinlərin köməyi ilə tapılıb.

Sonxeber.az xarici mediaya istinadla xəbər verir ki, turist Bodrum mərkəzində gəzərkən ailəsindən ayrı düşüb və bir müddət ondan xəbər almaq mümkün olmayıb. Bundan sonra onun axtarışlarına başlanılıb.

Araşdırmalar zamanı Theodorusun piyada şəkildə Bitez məhəlləsinə qədər getdiyi müəyyən edilib. Onun davranışlarından şübhələnən yerli sahibkarlardan biri turisti diqqətdə saxlayaraq təhlükəsizliyini təmin edib və polisə məlumat verib.

Hadisə yerinə gələn polis əməkdaşları və otel rəhbərliyi hollandiyalı turisti təhvil alaraq qaldığı otelə aparıblar. Bildirilib ki, turistin səhhəti ilə bağlı zaman-zaman unutqanlıq problemi yaşadığı məlum olub.

Hadisənin xoş sonluqla nəticələnməsində sosial şəbəkələrdə yayılan məlumatlar və polis əməkdaşlarının koordinasiyalı fəaliyyəti mühüm rol oynayıb.

Telegramda izləyin