Şarj cihazı daim qoşulu olarsa, nə baş verir?

Mütəxəssislər istifadə edilməyən şarj cihazlarının elektrik yuvasına qoşulu vəziyyətdə saxlanılmasının bəzi hallarda ciddi təhlükələr yarada biləcəyini bildirirlər. Onların sözlərinə görə, bu vərdiş həm yanğın riskini artıra, həm də lazımsız enerji sərfiyyatına səbəb ola bilər. Evlərdə telefon, noutbuk və digər elektron cihazların şarj adapterləri çox vaxt gecə-gündüz elektrik yuvasına qoşulu qalır. Lakin enerji mütəxəssisləri istifadə olunmadıqda onları elektrik şəbəkəsindən ayırmağı tövsiyə edirlər.

Lent.az xarici mediaya istinadla xəbər verir ki, enerji sahəsi üzrə ekspert və Suntrek Solar şirkətinin rəhbəri İtan Haynın sözlərinə görə, istifadə olunmayan şarj cihazlarını elektrik şəbəkəsindən ayırmaq həm enerji sərfiyyatını azaldır, həm də gərginlik sıçrayışlarının yaratdığı riskləri minimuma endirir.

Onun sözlərinə görə, elektrik şəbəkəsində yaranan gərginlik sıçrayışları yalnız ildırım zamanı baş vermir. Elektrik enerjisinə tələbatın kəskin artdığı dövrlərdə də belə hallar müşahidə oluna bilər. Nəticədə həssas elektron avadanlıqlar zədələnə bilər.

Keyfiyyətsiz adapterlər yanğın təhlükəsini artırır
Mütəxəssislərin fikrincə, elektrik şəbəkəsinə qoşulu qalan adapterlərin həddindən artıq qızması müəyyən risk yaradır. Xüsusilə ucuz və sertifikatsız məhsullarda həddindən artıq isinmə və qısaqapanmaya qarşı etibarlı mühafizə sistemi olmaya bilər. Belə adapterlərdən istifadə yanğın ehtimalını artırdığı üçün onların seçimində diqqətli olmaq tövsiyə edilir.

İstifadə olunmayan adapterlər də enerji sərf edir
Mütəxəssislər bildirirlər ki, heç bir cihaz adapterə qoşulmasa belə, o, elektrik yuvasına taxılı vəziyyətdə qalırsa, müəyyən miqdarda enerji sərf etməyə davam edir. Bu hal gizli enerji sərfiyyatı və ya fantom enerji istehlakı adlanır.

Müasir şarj cihazları orta hesabla 0,1-0,5 vatt enerji sərf edir. Bir adapter üçün bu göstərici əhəmiyyətli görünməsə də, evdə çox sayda adapterin daim elektrik şəbəkəsinə qoşulu qalması ümumi enerji sərfiyyatını artıra bilər. Bundan əlavə, adapterlərin vaxtaşırı elektrik şəbəkəsindən ayrılması onların daxili hissələrinin daha az qızmasına kömək edir və istifadə müddətini uzada bilər.

Hansı adapterləri elektrik şəbəkəsinə qoşulu saxlamaq olar?
Bütün adapterləri mütləq elektrik yuvasından çıxarmağa ehtiyac yoxdur. Təhlükəsizlik sistemləri, ağıllı ev avadanlıqları, videodomofonlar, bəzi tibbi cihazlar və fasiləsiz enerji ilə işləməli olan digər qurğuların adapterləri elektrik şəbəkəsinə qoşulu qala bilər.

Hansı cihazların şarj adapteri mütləq çıxarılmalıdır?
Mütəxəssislər smartfon, noutbuk, portativ enerji yığma qurğuları (powerbank) və digər batareyalı cihazlar tam dolduqdan sonra onların şarj adapterlərini elektrik yuvasından çıxarmağı məsləhət görürlər. Eyni tövsiyə elektrik velosipedləri, elektrik skuterləri və hoverbord kimi iri tutumlu batareyaya malik nəqliyyat vasitələrinə də aiddir.

İstilik yaradan cihazları nəzarətsiz qoymayın
Ekspertlər saç düzləşdiricisi, buruq aparatı, elektrik yorğanı, qızdırıcı və istilik yaradan digər elektrik cihazlarını istifadə etdikdən sonra mütləq elektrik şəbəkəsindən ayırmağı tövsiyə edirlər. Onların sözlərinə görə, qızan hər bir elektrik cihazı potensial yanğın mənbəyi hesab olunur. Buna görə belə cihazlar istifadə başa çatdıqdan sonra həm söndürülməli, həm də elektrik yuvasından çıxarılmalıdır.

Telegramda izləyin