Qəbul imtahanı zamanı çəkilən görüntüyə təpki yağır - VİDEO

Türkiyənin Osmaniyə şəhərində keçirilən universitetə qəbul imtahanının (YKS) ikinci mərhələsi olan Alan Yetərlilik Testi (AYT) zamanı yaşanan hadisə geniş müzakirələrə səbəb olub.

Sonxeber.az xarici mediaya istinadla xəbər verir ki, imtahan binasına çatmağa çalışan bir qız abituriyent qapıların bağlanmasına saniyələr qalmış məktəbə doğru qaçsa da, imtahan qaydaları səbəbindən içəri buraxılmayıb. Hadisə anının görüntüləri sosial şəbəkələrdə sürətlə yayılıb.

Kadrlarda nəfəs-nəfəsə məktəbə tərəf qaçan abituriyenti görən imtahan nəzarətçisinin qapını bağlayaraq binaya daxil olduğu əks olunub. Məktəbin qarşısında toplaşan bəzi valideynlər isə qızın içəri buraxılması üçün çağırışlar etsələr də, qaydalar dəyişdirilməyib.

İmtahana buraxılmayan gənc qız daha sonra məktəbin qarşısında göz yaşlarına hakim ola bilməyib.

Hadisə sosial şəbəkələrdə müxtəlif reaksiyalar doğurub. Bəzi istifadəçilər imtahan qaydalarının hamı üçün eyni şəkildə tətbiq edilməsinin vacibliyini vurğulasa da, digərləri nəzarətçinin davranışını sərt və anlayışsız hesab edərək tənqid ediblər.

Telegramda izləyin