Mətbəxdəki bu əşyalardan dərhal qurtulun - Evin bərəkətini qaçırdır

Mətbəx yalnız yemək hazırlanan yer deyil, həm də ailə üzvlərinin bir araya gəldiyi vacib məkan hesab olunur. Feng şui mütəxəssislərinin fikrincə, burada harmoniya yaratmaq üçün təkcə düzgün rəng seçimi deyil, mənfi enerji yaydığı düşünülən bəzi əşyalardan da vaxtında qurtulmaq lazımdır.

Lent.az bu əşyaları təqdim edir:

İnteryer terapiyası üzrə mütəxəssis Syuzanna Roynon mətbəxin evdə enerji axınına birbaşa təsir etdiyini bildirir. Onun sözlərinə görə, feng şuinin əsas məqsədi evdə harmoniya və enerji axınını yaxşılaşdırmaqdır.

1. Bıçaqları mətbəx masasının üzərində saxlamaq

Mütəxəssislər iti alətlərin açıq şəkildə göz önündə saxlanılmasını düzgün hesab etmirlər. İnanclara görə, bıçaqlar məkanın enerjisini "kəsir", bu isə gərginlik, əsəbilik və ailədaxili mübahisələrin artmasına səbəb ola bilər. Bundan əlavə, bıçaqları siyirmədə saxlamaq onların üzərində toz və yağ yığılmasının da qarşısını alır.

2. Qurudulmuş güllər və tikanlı bitkilər

Xalq inanclarına görə, qurumuş və ya solmuş güllər həyat enerjisinin zəifləməsini simvolizə edir. Belə bitkilər toz, hörümçək toru və həşəratların yaranmasına şərait yarada bilər ki, bu da evdəki ümumi rahatlığa mənfi təsir göstərir. Feng şui tərəfdarları tikanlı otaq bitkilərindən də uzaq durmağı məsləhət görürlər. Onların fikrincə, bu cür bitkilər mübahisələri və yorğunluğu artırır. İstisna kimi yalnız müalicə məqsədilə istifadə olunan kiçik aloe vera bitkisi göstərilir.

3. Çatlamış qab-qacaq

Çatlamış fincanlar, boşqablar və digər qablar da mənfi enerji simvolu hesab olunur. Onlardan istifadə həm təhlükəsizlik baxımından məqsədəuyğun deyil, həm də xalq inanclarına görə evdə bolluq və rifah hissini zəiflədir.

4. İşləməyən məişət texnikası

Uzun müddətdir xarab vəziyyətdə qalan çaydan, mikrodalğalı soba və ya digər texnikaların saxlanılması da tövsiyə edilmir. Əgər onları təmir etmək mümkün deyilsə, evdə artıq yer tutmaması üçün utilizasiya etmək daha məqsədəuyğun sayılır.

5. Lazımsız əşyalar və qarışıqlıq

Şkafların və mətbəx rəflərinin istifadə olunmayan qablar, köhnə qutular və digər lazımsız əşyalarla doldurulması məkanı daraldır. Mütəxəssislər hesab edirlər ki, səliqəli və geniş mətbəx həm rahatlıq hissini artırır, həm də gündəlik həyatda nizam-intizam yaratmağa kömək edir.

6. Boş və ya istifadə olunmayan qablar

Uzun müddət istifadə edilməyən boş bankalar, qablar və köhnə mətbəx ləvazimatları da artıq yüklənməyə səbəb olur. Onlardan qurtulmaq mətbəxdə daha çox boş yer yaradaraq gündəlik istifadəni asanlaşdıra bilər.

Qeyd etmək lazımdır ki, bu tövsiyələr əsasən feng şui və xalq inanclarına əsaslanır. Onların elmi təsdiqi yoxdur. Bununla belə, mətbəxdə təmizlik, səliqə və lazımsız əşyalardan qurtulmaq həm psixoloji rahatlıq, həm də funksional istifadə baxımından faydalı hesab olunur.

Telegramda izləyin