Piyada keçidində təhlükəli anlar: Sürücülər qaydalara əməl etmədi, vətəndaşlar etiraz etdi - VİDEO

Türkiyənin Hatay vilayətinin İskəndərun rayonunda piyada keçidindən istifadə etmək istəyən vətəndaşlar sürücülərin yol verməməsinə etiraz ediblər.

Sonxeber.az xarici mediaya istinadla xəbər verir ki, hadisə iki gənc qadın tərəfindən mobil telefonla lentə alınıb.

Görüntülərdə piyada keçidində gözləyən insanların qarşı tərəfə keçməkdə çətinlik çəkdiyi, bəzi sürücülərin isə sürəti azaltmadan piyadaların üzərinə doğru hərəkət etdiyi əks olunub. Gənc qadın sürücülərə səslənərək piyada keçidində dayanmağın qanunla tələb olunduğunu xatırladıb.

O, xarici ölkələrdə yol hərəkəti qaydalarını pozan sürücülərə tətbiq olunan sərt cəzaları nümunə göstərərək, belə tədbirlərin Türkiyədə də tətbiq edilməsinin vacibliyini vurğulayıb.
Maraqlı məqamlardan biri isə çəkiliş aparıldığını görən sürücülərin dərhal piyada keçidində dayanmağa başlaması olub. Yerli sakinlər piyada keçidlərində nəzarətin gücləndirilməsini və qaydaları pozan sürücülərin ciddi şəkildə cəzalandırılmasını tələb ediblər.

Telegramda izləyin