15 ildir tikir, 3 günə bitirib 20 min qazanır - VİDEO

Türkiyənin Ədirnə şəhərində yaşayan 47 yaşlı kispet ustası Adem Kayın 15 ildir yağlı güləşçilər üçün əl işi kispet hazırlayaraq bu ənənəvi sənəti yaşadır. Onun hazırladığı kispetlərin qiyməti 7 min 500 lirədən başlayaraq 20 min lirəyə qədər yüksəlir.

Sonxeber.az xarici mediaya istinadla xəbər verir ki, uşaqlıqdan Kırkpınar Yağlı Güləşlərini izlədiyini deyən Kayın, unudulmaq üzrə olan kispetçilik sənətini öyrənmək üçün ustadan altı ay təhsil aldığını və o vaxtdan bu peşə ilə məşğul olduğunu bildirib.

Ustanın sözlərinə görə, bir kispetin hazırlanması ən azı üç gün çəkir. Dana dərisindən hazırlanan bu geyim düzgün qulluq edildiyi halda 3-5 il istifadə oluna bilir. Güləşdən sonra kispet ilıq suda yuyulmalı, kölgədə qurudulmalı, yüngül yağlanaraq saxlanmalıdır.

Adem Kayın bildirib ki, hazırladığı kispetlərlə yarışan pəhləvanları xüsusi maraqla izləyir və onların uğur qazanması ona böyük qürur hissi yaşadır. O, təxminən 150 illik ustalıq irsini davam etdirdiyini və bu sənəti gələcək nəsillərə ötürməyi qarşısına məqsəd qoyduğunu vurğulayıb.

Telegramda izləyin