"Azərbaycan bu cür tədbirlərlə türk dünyasının ortaq gələcəyinə xidmət edən yeni əməkdaşlıq modelini formalaşdırır" - Bəhruz Quliyev

""Türk Dünyası Həftəsi" iştirakçılarının işğaldan azad edilmiş ərazilərə səfəri təkcə simvolik xarakter daşımır, bu, həm də siyasi və geosiyasi mesaj daşıyan mühüm hadisədir. Xarici qonaqların Qarabağ və Şərqi Zəngəzurda aparılan genişmiqyaslı bərpa və yenidənqurma işlərini yerində görməsi uzun illər Azərbaycana qarşı formalaşdırılmış dezinformasiya kampaniyalarının iflasa uğradığını bir daha nümayiş etdirir.Bu səfər göstərir ki, türk dünyasının inteqrasiyası artıq yalnız ortaq tarix və mədəniyyət üzərində deyil, eyni zamanda ortaq siyasi iradə və strateji əməkdaşlıq üzərində inkişaf edir. İşğaldan azad edilmiş ərazilərin beynəlxalq tədbirlərin keçirildiyi məkana çevrilməsi Azərbaycanın həmin torpaqlarda suverenliyinin tam bərqərar olduğunu və normal həyatın sürətlə bərpa edildiyini nümayiş etdirir."

Bu fikirləri Sonxeber.az-a danışan Səs qəzetinin baş redaktoru, siyasi ekspert Bəhruz Quliyev deyib.

"Onu da qeyd edək ki, eyni zamanda, bu səfər türk dövlətləri arasında həmrəyliyin gücləndiyini, Qarabağın artıq münaqişə məkanı deyil, əməkdaşlıq, inkişaf və inteqrasiya platformasına çevrildiyini göstərən mühüm mesajdır. Bu, bölgədə davamlı sülhün, iqtisadi inkişafın və nəqliyyat-kommunikasiya layihələrinin gələcəyi baxımından da xüsusi əhəmiyyət daşıyır.

Düşünürəm ki, Azərbaycan bu cür tədbirlərlə təkcə öz uğurlarını nümayiş etdirmir, həm də türk dünyasının ortaq gələcəyinə xidmət edən yeni əməkdaşlıq modelini formalaşdırır. Bu isə həm regional sabitliyin möhkəmlənməsinə, həm də Türk dünyasının beynəlxalq münasibətlər sistemində vahid siyasi və strateji aktor kimi mövqeyinin güclənməsinə töhfə verir." - deyə, B.Quliyev əlavə edib.

Telegramda izləyin