Motosikletli şəxs silahı ətrafdakı insanlara tuşladı - VİDEO

İstanbulun Küçükçekmece rayonunda motosikletlə hərəkətdə olan bir şəxsin əlindəki tapançanı ətrafdakı insanlara tuşladığı anlar mobil telefon kamerası ilə qeydə alınıb. Sosial şəbəkələrdə yayılan görüntülər geniş rezonans doğurub.

Sonxeber.az xarici mediaya istinadla xəbər verir ki, hadisə gecə saatlarında baş verib. Videoda motosikletlə hərəkət edən şəxsin bir müddət yolda gözlədiyi, daha sonra əlindəki silahı qaldıraraq ətrafda olan vətəndaşların istiqamətinə yönəltdiyi görünür.

Avtomobildən çəkilən kadrlarda motosikletlinin əvvəlcə əllərini başına apardığı, ardınca isə tapançanı yolun kənarında dayanan insanların olduğu istiqamətə tuşladığı əks olunub. Həmin vaxt ərazidə çoxlu sayda insanın və fəaliyyət göstərən obyektlərin olduğu da görüntülərdə yer alıb.

Kadrlarda motosikletin dövlət qeydiyyat nişanı da görünür. Bir qədər sonra həmin şəxs motosikleti ilə ərazidən uzaqlaşıb.

Hadisə ilə bağlı rəsmi qurumlar hələlik açıqlama verməyib.

Görüntülərin sosial şəbəkələrdə yayılmasından sonra çoxsaylı istifadəçilər İstanbul Polis İdarəsini və digər aidiyyəti qurumları işarələyərək hadisənin araşdırılması və qanunamüvafiq tədbirlərin görülməsi çağırışı ediblər.

Telegramda izləyin