"Birinci Türkoloji Qurultay iştirakçılarının Qarabağa səfəri bizim üçün olduqca əhəmiyyətlidir" - DEPUTAT

"20 ölkədən 215-dən artıq qonaq Birinci Türkoloji Qurultayın 100 illiyi çərçivədə keçirilən "Türk Dünyası Həftəsi" ilə bağlı ölkəmizdə səfərdədirlər. Birinci Türkoloji Qurultayı elmi toplantı ilə yanaşı həm də türk dünyasının intellektual birliyinin təməlini qoyan tarixi dönüş nöqtəsi kimi dəyərləndirilməlidir".

Bunu Sonxeber.az-a danışan Milli Məclisin deputatı, Ana Vətən Partiyasının sədri Günay Ağamalı bildirib.

Deputat qeyd edib ki, bütün türk dünyasını birləşdirən qurultayın Bakıda keçirilməsi Azərbaycanın regional lider və intellektual mərkəz rolunu gücləndirir. Bu gün qurultay türk dövlətləri arasında əməkdaşlıq gücləndirməklə yanaşı ortaq mədəni və dil siyasəti aktuallaşır. Ona görə də Bakının 100 ildən sonra yenidən türkologiyanın gələcəyini müəyyənləşdirdiyini də söyləyə bilərik. Ən önəmlisi isə bu gün bilirsiniz konqres iştirakçıları Qarabağda səfərdədir.

"Türk Dünyası Həftəsi" iştirakçılarının Qarabağa səfəri bizim üçün olduqca əhəmiyyətlidir. Çünki bu səfər həm siyasi, həm də geosiyasi mesaj daşıyan mühüm hadisədir. Qonaqlar Qarabağ və Şərqi Zəngəzurda aparılan genişmiqyaslı bərpa və yenidənqurma işləri ilə yerində tanış olacaqlar. Əlbəttə ki, bu uzun illər Azərbaycana qarşı formalaşdırılmış dezinformasiya kampaniyalarının növbəti dəfə iflasa uğraması deməkdir".

Deputat vurğulayıb ki, bu səfər göstərir ki, türk dünyasının inteqrasiyası artıq yalnız ortaq tarix və mədəniyyət üzərində deyil, eyni zamanda ortaq siyasi iradə və strateji əməkdaşlıq üzərində inkişaf edir:

Bu gün işğaldan azad edilmiş ərazilərin beynəlxalq tədbirlərin keçirildiyi məkana çevrilməsi, ölkəmizə səfərə gələn qonaqların Qarabağa səfərləri Azərbaycanın həmin torpaqlarda suverenliyinin tam bərqərar olduğunu və normal həyatın sürətlə bərpa edildiyini nümayiş etdirir. Ümumilikdə isə ölkəmizdə Birinci Türkoloji Qurultayı keçirilməsi Türk dünyasının beynəlxalq münasibətlər sistemində vahid siyasi və strateji aktor kimi mövqeyinin bundan sonra da güclənməsinə töhfə verəcək".

Telegramda izləyin